沙田好運中心翻新 目標媲美新城市？

最近fb專頁「沙田」爆料指沙田好運中心商場，將進行為期3年大翻新，據說投資額達數億元，翻新後，將媲美沙田中心、新城市廣場級數。

其實好運中心的翻新計畫，有留意開華懋新聞就會知道2018年已經有透露過，當時華懋集團租務部主管譚維冠曾表示，好運中心、希爾頓中心等會於2019年起逐步翻新。所以上年開始，你會見到好運中心已經彌漫「死場」感覺，不知是有意自然流失等大翻新，抑或社會動蕩加疫情影響變成死場？但結果正如專頁「沙田」所講，未來會分4期翻新，成因「不用分那麼細」。

翻新消息在沙田友群組瘋傳後，不少居民認為沙田其實已不再需要「有級數」的商場，反而要貼地、方便、買到生活所需的商場。

不過回顧好運中心歷史，以前的確是個「有級數」的商場，80年代已經是「銀行商場」，又有規模勁大的酒家，買到生活所需的店舖應有盡有，絕不遜色於新城市廣場；新城鎮的商場當中，當年好運算是區內的「有級數」商場。

90年代治安較差，好運中心有機舖也有老翻店，慢慢就變成了專做年輕人生意的商場，早期有「鍾意圖書」，有中學生舊書店，也有著名動漫小店「龍城」。2000年敦煌變成百佳，前有百佳，後有馬會，人流勁旺，但隨著新城市廣場等其他商場升級，區內居民對好運再不滿足於一個「賣game」的商場，慢慢消費力就轉移去其他地方，好運就點都唔會有名店感覺。

通常「死場」翻新，一係用蚊型舖加夾公仔機、格仔鋪重新推出市面頂住先，為食現金流，一係參考「舖王」波叔，開個開百日喪屍館谷死場，不過呢兩招應用喺好運身上，似乎就唔多work。

沙田不是旺角，客源都是中年人或老人家，加上石門京瑞事實上已取代以前好運的功能，好運中心再難針對年輕人口突圍；至於搞活動，除非能夠將所有銀行、財仔都一併流失，否則發揮空間相當有限。

好運中心連接沙田街市，以前食盡沙田區多條屋邨人流，如今各區都有經翻新的街市和商場，中年沙田友又多數駕車，高消費力還會經好運的實在不多。

那麼，剩下街坊生意的商場，又是否適合「新城市廣場級數」呢，實在值得華懋深思。

對面沙田中心「莎莎級數」都尚且難做，如果好運中心開Fancl、Armani、La Mer，平日行開好運買手機的菲傭、買海味韓國人蔘的大媽，會唔會覺得咁係好事呢？

===============

精選資訊網站「中環街市」 臉書粉絲頁