雅虎香港新聞 法網伊人︳極隱秘延續篇《法網外的伊人》 劉德華張柏芝梁詠琪客串 郭可盈交代驚人後續
TVB深夜重播劇《法網伊人》接近尾聲，當年套劇收視全年第一，換著而家可能已經會拍續集。不過《法網伊人》都有好似日劇嘅延續短篇版SP《法網外的伊人》，卡士仲好強勁，有劉德華、張柏芝、梁詠琪同陳慧珊等巨星客串，郭可盈亦有出場，反而其他原班人馬謝天華、吳綺莉同劉綽琪就冇份。
《法網伊人》結局後幾個月，TVB為李克勤拍音樂特輯，就係借《法》故事展開另一個篇章。
（下面有《法網伊人》劇透）
《法網伊人》結局講到高志朗（李克勤飾）去英國打官司，沈學儀（郭可盈飾）決定跟埋過去，本來二人走到談婚論嫁階段，但係後來學儀同囝囝QQ突然失去蹤影。5年後，高志朗收到沈學儀嘅信，要求喺香港見面，志朗由英國返港準時赴約，不過學儀冇出現，反而遇上另一個沈學儀（梁詠琪飾）。
呢個沈學儀同男友分開之後，仍然收到念佬不忘嘅前度寄上嘅拼圖，一日一塊。沈學儀因為腦入面有個血管瘤，隨時會死，於是唔敢將拼圖砌好。而志朗發現被跟蹤，於是搵楊明（原本謝天華飾演，特輯冇出現）幫手，得知係由一個叫IC（張柏芝飾）嘅女仔主導，志朗亦懷疑IC偽冒舊愛沈學儀筆跡寫信。
IC經常整蠱人，當中包括日日食叉燒飯嘅痴情的士司機肥華（劉德華飾）。志朗後來目睹IC將以學儀名義所寫嘅信送上，IC亦答應告知學儀出走真相︰志朗要到美國開會，學儀喺英國同QQ搵學校時遇上車禍，QQ傷重死亡，令學儀悔疚不已，並且到外地旅遊散心，因而認識IC。IC決定替學儀交代一切。而另一邊廂的沈學儀（梁詠琪）舊患復發，生命危在旦夕……
呢個陣容咁厲害，不過收視麻麻只有15點，而且劇情其實都有啲膠，同《法網伊人》亦冇咩關連。《法網外的伊人》拍攝時有傳柏芝同謝霆鋒感情關係糾纏不清，克勤當時大讚柏芝「道行高」，本身已經唔開心都肯出手幫助，夠晒義氣喎。
按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
