【泰國酒店比拼】3大新開業布吉酒店！ 7,000呎超豪別墅房+望日落星級酒店

嚟到暑假，大家都好想玩水消暑！布吉當然係大家其中一個目的地，隨著唔少國際酒店品牌落戶，開始有百花齊放競爭嘅情況，大家都鬥質素鬥價，最開心當然係我哋遊客啦！一齊睇下以下3大名牌，全部開業兩年左右，夠新夠正！

Rosewood首間布吉酒店 夠奢華！

Rosewood係國際集團，香港剛剛開咗一間都成為話題之作；布吉呢間Rosewood於前年11月先開，位於芭東海灘之上，賣點係異常奢華，酒店全部係別墅房，共有71座，每一間最細都有1,000呎，最大一間可以去到7,000呎！當然每間都設有獨立泳池。酒店近海灘，亦有Infinty Pool，無盡海景泳池。最特別係酒店被松樹林所包圍，周圍都係高杉大樹，有啲樹更有成150歲！

舒適度：*****（以5星為滿分）

酒店以簡單設計為主，雖然如此亦難掩其奢華，酒店由著名曼谷設計團隊PLA負責，務求住客唔似住酒店，反而想有家嘅感覺。

設施：****½

每間別墅都有獨立泳池，加上酒店有多間唔同風格餐廳，食材新鮮天然；另外距離最近芭東中心商場都係15分鐘車程。

抵玩度：***

作為國際品牌，價錢當然唔會平，以暑假8月價錢，一晚約$3,700 ，包二人早餐；住一、兩晚再轉酒店都不失為好選擇。

Rosewood Phuket

預訂：按這裡

——————————————————————————–

米芝蓮星級酒店My Beach Resort 近市中心

米芝蓮唔單止為美食評級，同時都有為酒店評級，而2019年星級酒店之一就係呢間My Beach Resort，位於攀牙海岸。酒店除咗有私人海灘及庭園，作為米芝蓮酒店，呢度仲有24管家服務，可以處理酒店大小事務，包括直接送上餐飲等。另一賣點係酒店極近攀牙市中心，約5分鐘車程，交通方便，慳唔少時間。

舒適度：****（以5星為滿分）

酒店Resort 82間房大部分望海，而且可以望正日落美景，住幾多晚都唔會怕悶。

設施：****

Resort特別設有兒童遊樂場，另有托兒服務，可以畀住客放低小朋友自己出去四周遊覽下。

抵玩度：****

海景房都係1千蚊左右，當然無獨立泳池呢啲豪華設施。不過作為米芝蓮級數，呢個價錢真係超值。

My Beach Resort

預訂：按這裡

——————————————————————————–

16間房適合朋友/家庭居住度假村爭崩頭！布吉競爭激烈，唔少新酒店落成吸客，但呢一間居然唔係為咗要多客，寧願貴精不貴多。Baba Beach Club全度假村只有16間房，最特別係有別於一般度假村，呢度係以中式設計，似足中庭四合園，房間從700至1,100呎，有特大5房設計，適合一大班朋友或舉家族入住。度假村係中西合璧設計，外表係中式，不過入面裝潢都用西式，每房亦有私人泳池及按摩浴缸。

舒適度：*****（以5星為滿分）

度假村中西合璧設計，內裡用上全西方設計，同其他5星級度假村一樣咁舒服。

設施：****

2米King Size大床，按摩缸、超大電視，免費Wi-Fi等一應俱全。

抵玩度：****

作為打卡度滿分嘅中西合璧設計度假村，每晚大概$1,300左右，可以話超值。

Baba Beach Club Phuket

預訂：按這裡

【立即讚好】全新 Yahoo 旅遊 Facebook 專頁

Yahoo 旅遊以全新樣貌登場，Facebook 專頁當然同時煥然一新！立即讚好，每日睇盡旅遊新資訊！