泳兒睇中日本車 揸軚盤試手感

東方日報
·1 分鐘文章
白色車啱晒心水,不過泳兒研究一輪後未有「扑槌」。
白色車啱晒心水,不過泳兒研究一輪後未有「扑槌」。

歌手泳兒之前買二手車臨門一腳「撻Q」後,日前在友人陪同下現身灣仔一間日本名車車行。似有明確目標的她對價值近38萬、最新型號的白色7人四驅車情有獨鍾,期間驗車技工上身,由車頭「檢查」到車尾箱,更登上駕駛座揸軚盤試手感,全方位體驗做車主的滋味。之後她不忘用消毒液搓手,防疫工夫做到足!

做司機接載男友

試完一輪後她未有即時「扑槌」,密斟一輪後,與友人望多眼靚車就離開,並步行至附近的個人護理店買口罩。泳兒事後受訪時承認四出睇車,又大談理想座駕:「高身嘅話睇嘢清楚啲、安全啲,車尾箱短就易泊車,因為未純熟泊車,怕揸大車拿捏唔到距離。我鍾意白色車,不過嗰日睇嗰架車,尾箱比較長。」

她又直言當日睇的四驅車超出其預算:「當然愈平愈好,我唔介意買二手車,新車就睇性能、趨勢。」又表示樂做男友的「柴可夫」:「佢本身有車牌,但過咗期要再考,所以佢依家見我借朋友架車嚟操就好開心,因為我會接佢返工放工,希望快啲買到車。」

泳兒
泳兒