洪永城廁所蝦碌求婚 女友急到Stop!

洪永城與梁諾妍修成正果,正着手籌備婚禮。
洪永城與梁諾妍修成正果,正着手籌備婚禮。

藝人洪永城梁諾妍昨日公布婚訊,並已秘密拍下婚照。準新娘踢爆男友選擇於廁所求婚,她又感動又「好急」,要解決完才可以Say Yes!而洪永城則公開深情剖白:「追到你是我的僥倖,娶到你是我的福氣!」

洪永城與梁諾妍於2018年公開認愛,拍拖以來感情穩定,近年更屢傳婚訊,昨日2人終公布喜訊:「我哋要結婚啦!」原來兩口子已拍攝婚照,其中一張在運動場跳起,笑容燦爛,幸福滿瀉!洪永城指婚照是悉心安排:「造型上我係旅遊Look,跑步就係佢嘅標記,出嚟效果好靚。」

2人分別在社交網發表愛的宣言,洪永城回顧由拍拖到同居的點滴:「由一齊跑步、到傾電話、睇日出、拍拖、不計劃的旅行、到扮攰逃避跑步、通宵睇動漫、同居、到我們至愛Coco離世、到開工連晚安早晨都沒有機會同你講、到今日一齊攜手踏上我倆的新旅程,好在有你,緊握我手,我希望一世都有你在身旁,追到你是我的僥倖,娶到你是我的福氣!」梁諾妍則說:「下半生手拖手,繼續一起跑下去。」

今年舉行婚禮

洪永城向來鬼主意多多,連求婚都別樹一幟,梁諾妍說:「求婚過程好好笑,好多蝦碌嘢發生!佢喺屋企個廁所求婚,好係佢嘅Style,我笑到喊,不過都好感動!當晚我人有三急入廁所,佢又跟住入去,當我打開門,原來佢喺廁所布置咗一個攝錄機,又喺洗手盆放咗啲微型燈泡,又有一束鮮花,鏡上貼咗心形卡寫上『MARRY ME?』。最好笑係佢拎隻戒指出嚟嘅時候,我話我真係好急,你等一等我去完廁所先,結果佢要等我辦完大事再求婚,我就Say Yes!」

洪永城受訪時透露於農曆新年後求婚,然後開始籌備他監製的電視劇,2人邊忙工作邊籌備婚禮,預計今年內舉行。而他昨晚接受《東張西望》訪問時笑談求婚經過:「本來我想跪地,但佢話屙埋先,我就喺旁邊等。」

洪永城與梁諾妍一身便服,在運動場影婚照。
洪永城與梁諾妍一身便服,在運動場影婚照。