派線眼溫哥華直擊選美過程 鍾麗緹隔空打氣 大女Yasmine奪華姐亞軍

·2 分鐘文章
Yasmine參選華姐打響知名度,有意到內地發展。
Yasmine參選華姐打響知名度,有意到內地發展。

女星鍾麗緹(Christy)大女Yasmine(張敏鈞)承傳母親選美之路,參選今年溫哥華華裔小姐,最終不負眾望贏得亞軍!為了見證女兒重要一刻,身在內地的Christy一早派定「線眼」全程直擊選美過程,大讚女兒美貌與智慧並重,是她心目中的超班冠軍!

現年23歲的Yasmine早前參加《溫哥華華裔小姐競選2021》,於香港時間昨晨進行錄影,8位佳麗於「快問快答」、「才藝表演」及「泳衣」等環節中,施展渾身解數爭奪多個獎項。Yasmine在問答環節中表現出色,最終勇奪亞軍,冠軍及季軍分別是吳昕宸及吳育廷。整個選美過程節奏緊湊,眾佳麗均有不錯表現。

Christy賽前已不斷為女兒打氣,並授予選美錦囊「最緊要放鬆」,希望囡囡享受過程。由於選美以錄播形式進行,節目將於12月12日在加拿大新時代電視台播出,但一向關心囡囡的Christy,當然要第一時間知道情況,故早已派「線眼」直擊整個選美過程。

「喺我心目中係冠軍」

對於Yasmine不負眾望奪得亞軍,Christy笑言:「好開心,我都幾意外,佢答問題答得咁好,好聰明同埋有幽默感。佢喺才藝表演彈結他,亦彈得好好,多才多藝,所以佢喺我心目中已經係冠軍。(支持囡囡發展演藝事業?)佢做乜嘢決定我都支持,佢喜歡唱歌、跳舞同拍戲,亦有讀Natural integrated medicine想行醫,總之佢想點都可以,最緊要佢開心。」

選美結束後,Yasmine即向媽媽報喜,指選美過程「太快」,非常享受。而Christy指輸贏並不重要,提升自我才最重要。為了今次選美,Yasmine努力減磅,Christy笑言囡囡瘦了不少,如今終可盡情食:「佢為咗今次選美,不停做運動,佢真係瘦咗好多,所以我叫佢快啲去食Pizza、意大利麵,喺我嘅角度開心、健康最緊要。」

考慮到內地發展

而Yasmine受訪時表示選美最大得着是「認識自己」:「選美令我學到好多嘢,但最大得着係令我更加了解自己。」一向喜歡演戲及唱歌的她直言想入行,並指今次選美令她與媽媽關係拉得更近:「因為我同媽咪都有好多地方相似,依家參加埋選美就再多一樣似嘅地方,我哋嘅相處一直都似兩姊妹。(想返內地發展?)之前冇諗過,依家都可以考慮,睇吓之後有冇機會。」

鍾麗緹是選美冠軍,有將參賽心得傳授給女兒。
鍾麗緹是選美冠軍,有將參賽心得傳授給女兒。
吳昕宸(中)奪冠軍,亞軍及季軍分別是張敏鈞(左)及吳育廷。
吳昕宸(中)奪冠軍,亞軍及季軍分別是張敏鈞(左)及吳育廷。



我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能