消防處都有代言人 佢叫「任何仁」

19+

 

揀星期一做呢個宣傳,唔贏有鬼!

 

消防處今日隆重介紹該處嘅吉祥物。佢,笨唔係消防員,或者一粒火種呢啲咁易估到嘅icon﹐

而係一個全身藍色嘅人形物體。

 

個名就不得了囉,叫「任何仁」!!

 

叫「任何仁」,寓意任何一個市民都可以救到人,掌握防火知識云云。

原來阿「任何仁」之前已經現身,喺一條8月推出、羅蘭姐有份演出嘅短片,

就已經見到呢個藍色人,教大家如果有人暈低的話,

點用心肺復甦法(CPR)同自動外置式心臟去纖顫器(AED)救人一命。

去片!

 

第一眼望,我以為係《低俗喜劇》音音姐個造型。

喂,消防嘅代言人叫「任何仁」就得,

咁其他部門都唔駛r晒頭諗搵埋公仔做代言人啦!

邊駛搞到「清潔龍阿德」咁又抽水又要rap咩?

 

警務處:武賊仁(顏色就梗係藍啦!有咁藍得咁藍,似返警察制服!)

香港郵政︰宋信仁(灰色啦,著到好似順x物流啲哥仔咁……而家你去郵局多,定係去「順記」寄嘢收貨多?)

稅務局︰立歲仁(一定係「稅單綠」啦,見到就驚!)

懲教處:石范仁(錫住啲犯人咁解。黑白間條,易明!)

拓展署︰大嶼人(力谷東大嶼嘛,顏色就揀淺粉紅色啦,反正遲下啲粉紅色嘅中華白海豚都游埋一二邊唔阻你發展lu)

其他內容