【淨係TVB已經有好多】邊個係「富二代」筍盤明星？

很多人都會認為啲「富二代」因為屋企有錢，可以盡情吃喝玩樂、生活無憂唔使做，但係有錢真係唔代表一切，有班默默耕耘嘅「富二代」就選擇加入娛樂圈發展，今日就同大家介紹下呢班娛樂圈「富二代」筍盤喇！

趙希洛
07年香港小姐入圍最後五強，現年34歲嘅趙希洛由低做起，多年嚟都係做閒角居多，直至憑劇集《超能老豆》中飾演賢妻而人氣急升，唔少網民大讚佢有演技兼「Wifeable」。趙希洛嘅家境絕對唔可以睇少，佢媽媽係前無綫藝員梁小玲，爸爸就係喺澳洲經營石油生意。有報道指佢現時住喺半山豪宅，出入有司機接送又有名車代步。不過Candice作風低調，平時返工都會打扮得好樸素，有時仲會搭港鐵再轉車返電視城。

郭子豪
現年25歲嘅郭子豪，憑著喺劇集《親親我好媽》中飾演學生而被觀眾認識，佢更被網民視為今年其中一位有潛質上位嘅小生。郭子豪有樣、有學歷、有家底，爸爸經營時裝貿易生意，父母住喺大埔豪宅，而佢就想要私人空間，所以就以月租約三萬五租住附近嘅屋苑，平時出入都有值80萬嘅名車代步。

朱千雪
2012年港姐季軍，入行後一直獲得無綫力捧，上年喺劇集《EU超時任務》首次擔演第一女主角而人氣急升。千雪BB唔止有樣同有學歷，佢嘅家底亦都好豐厚。爸爸經營五金生意，仲傳佢細細個已經擁有兩個市值過千萬嘅單位。

黃翠如
黃翠如12年由有線過檔無綫後，極速獲得力捧上位，劇集、綜藝、旅遊節目樣樣齊。喺14年同蕭正楠因拍攝劇集《師奶Madam》而撻着，翠如BB除咗事業一帆風順，愛情得意之外，屋企亦非常有米，爸爸旗下公司喺上年4月上市，身家億億聲。

何雁詩
參加09年《超級巨聲》入行，何雁詩唔止唱歌好聽，之前亦憑劇集《四個女仔三個BAR》被網民讚佢好演技。何雁詩同樣有一個做生意嘅有錢爸爸，有報道仲話佢喺14年已經以自己名義買咗一個市值850萬浪澄灣單位，年紀輕輕就已經擁有自己嘅物業，真係羡慕死唔少人呀！

王卓淇
如果淨係睇名，大家可能唔係好知佢係邊個，其實佢係14年港姐亞軍，亦係坤哥嘅緋聞女友。王卓淇喺上年憑住《愛情食物鍊》中成日著住熱褲小背心，成功吸引網民注意。王卓淇爸爸係護膚品生產商，喺東莞嘅廠房有成50萬呎。有指佢年紀輕輕已經有物業揸手。