雅虎香港新聞 深水埗新開民族x旅遊主題餐廳 特色土耳其早餐+異國風菜式
好想去旅行？深水埗呢間新店就可以畀大家體驗坐喺中亞常見嘅Tapchan上面，嘆傳統土耳其早餐！皆因小店由四位鍾意旅行嘅Backpackers開設，不約而同都特別鍾意民族色彩豐富嘅國家，所以開店嘅時候就將當地嘅美食同裝飾帶過嚟香港。
Lonely Paisley位於深水埗福華街，係一間以民族同旅遊為主題嘅多國菜餐廳。店名Paisley指腰果花，係民族風常見元素。而Lonely Paisley簡寫LP，亦係向Backpackers必有嘅《Lonely Planet》致敬。
土耳其早餐·附土耳其茶（$148）
Sonya指正宗嘅土耳其早餐好似去飲茶咁，係用一個個細碟奉上唔同食物，而且唔同地方都會有唔同特色。嚟到香港變為一人版就只保留精髓：土耳其芝麻麵包Simit，配搭三款芝士、土耳其雞肉腸、雞蛋，再加上四款醬料。
四款醬料分別係中東茄子泥（Ghanoush）、Honey & Cream、杏桃果醬同無花果果醬。四款都可以配搭口感煙韌富芝麻香氣嘅Simit麵包，而無花果果醬亦可以加落沙律當醬汁享用。三款芝士建議先食粒狀同絲狀嘅牛奶芝士，最後先食煎過嘅希臘藍芝士，由淡嘅奶香食到最後嘅鹹香。
墨西哥彩虹沙律（$128）
墨西哥菜色彩繽紛，呢碗彩虹沙律就係其中一個好例子！有墨西哥菜唔少得嘅牛油果同粟米，加上車厘茄、紫椰菜、甜椒等蔬菜，最後加上芝士同牛油果蓉。值得一提嘅係牛油果蓉當中加入香料調味，令清爽嘅沙律食落更豐富更惹味。
印度脆球配海蝦冬陰公（$88/6件）
印度脆球（Pani Puri）係當地嘅街頭小食之一，不過Sonya就將醬汁改良為泰式冬陰公再加上海蝦。食起嚟脆球口感薄脆唔油膩，蝦肉彈牙爽口，建議先加一羮冬陰公醬汁試下，皆因入口會先試到香料味同酸味，辣勁之後先會湧上嚟！非常過癮。
土耳其開心果千層酥（$58/2件）
提到土耳其甜品相信大家都會覺得好甜，因此Sonya將原本食譜嘅甜度減半。開心果千層酥同樣係土耳其經典甜點之一，細細件但會食到三重口感：上面嘅千層酥脆，中間開心果係一粒粒果仁咬口，下面嘅酥皮浸過蜜糖所以濕潤偏軟。整體都係以甜味為主，建議同朋友分享，一人一件就啱啱好。
Hong Kong Real Ginger Cacao（$48）
除咗其他國家嘅特色食物，呢度亦有加入本地元素，例如呢杯薑生可可係用好夠薑喺荔枝窩鄉郊種嘅老薑配搭可可，所以飲落亦薑嘅辛辣香氣為主，同時又會飲到可可嘅微甜，學Sonya話好啱女仔飲呀！
Hand Drip Coffee（$68起）
餐廳其中一位店主係咖啡師，呢度無論係意式咖啡定手沖咖啡，用嘅都係自家烘焙嘅咖啡店。推介坊間較為少見嘅印度豆Attikan，厭氧日曬處理加上中淺焙，熱飲會有無花果乾嘅甜度同少少酒香，餘韻帶酸。
Blue Lagoon（$58）
呢度亦有供應嚟自世界各地手工啤酒、紅白酒，特色Cocktail同Mocktail，呢杯藍色嘅Mocktail以以冰島藍湖為設計概念，以Lemonade、柚子汁等調配而成。杯邊加上糖霜，所以飲嘅時候糖霜嘅甜味會帶起檸檬同柚子嘅酸味，味道平衡清爽。
Lonely Paisley
地址：深水埗福華街182-186號怡華閣地下A號舖
