深水埗新開貼地素食Cafe 芫荽漢堡/生酮泰式沙律/自家製甜品

OpenRice開飯喇

近日深水埗成為文青熱點,除咗去咖啡店打卡,區內仲有唔少特色餐廳等大家發掘。好似呢間係素食Cafe嘅新線,唔少菜式都係全素或者可以走蛋奶或五辛,而且口味同選擇都更多元化,好似芫荽版嘅不可能漢堡包,適合生酮飲食嘅泰式沙律,唔同客人嚟都總有啱嘅嘢食,夠貼地!

The Park by Years
The Park by Years

The Park by Years係同區Years嘅新線,唔單止空間更大,餐牌亦有唔同。新店會有比較多輕食,例如沙律、燕麥碗等,如果想食意粉或者意大利飯嘅話,舊店就會比較多選擇。新店近門口位有一排木櫃,放咗本地醬園出品,甚至係圍村嘅黃酒釀!原來係希望多啲推廣「香港製造」嘅食物,另外仲有其他店主選物,就算唔入嚟食嘢都可以買走㗎。

生酮泰式沙律($88,送熱玄米茶/凍黑豆茶)
生酮泰式沙律($88,送熱玄米茶/凍黑豆茶)

又要茹素又要進行生酮飲食唔容易,店主就特別構思出呢份泰式沙律,用牛油果提供脂肪,豆腐提供蛋白質。其他配料亦相當豐富,中間係用青瓜同胡蘿蔔刨絲,撈埋用花生醬、是拉差、青檸汁、九層塔等調配嘅泰式醬汁,入口有酸、辣、涼、爽多重層次。加上滑嫩嘅腌豆腐、Creamy嘅牛油果,爽脆嘅紫椰菜同芽菜,口感豐富又醒胃。

不可能漢堡包(芫荽版)($138,送熱玄米茶/凍黑豆茶)
不可能漢堡包(芫荽版)($138,送熱玄米茶/凍黑豆茶)

本店大受歡迎嘅不可能漢堡包,新店就演變成芫荽版!漢堡扒依然選用Impossible™ Meat植物牛肉,配搭自家製素芝士、腌洋蔥、青瓜、茄汁,同最重要嘅雙層新鮮芫荽。漢堡扒食落口感同味道都幾似牛肉,素芝士帶鹹香,而茄汁增加酸味,不過最突出嘅都係芫荽味!

不可能漢堡包(芫荽版)($138,送熱玄米茶/凍黑豆茶)
不可能漢堡包(芫荽版)($138,送熱玄米茶/凍黑豆茶)

加埋腌洋蔥同青瓜整體相當清爽,唔食芫荽嘅朋友,可以請店員將芫荽轉為火箭菜。而炸蕃薯條甜味自然討喜,唔點茄汁都已經夠好食。貼心嘅地方麵包係請同區一間烘焙店合作,供應新鮮嘅無蛋奶麵包,咬落不失鬆彈。

沙茶醬燒粟米($58)
沙茶醬燒粟米($58)

燒粟米有一粒粒咬口,保留粟米本身嘅清甜,再加上陣陣焦香同沙茶醬嘅鹹香,係會令人忍唔住食完一條接一條,建議同朋友Share當開胃小食,分量啱啱好。

燉雪梨熱香餅($148,送熱玄米茶/凍黑豆茶)
燉雪梨熱香餅($148,送熱玄米茶/凍黑豆茶)

分量大加上材料豐富,真係可以甜品當正餐咁食!三層熱香餅夾素忌廉同燉雪梨,雪梨用自家製洛神花糖漿燉至腍身,有洛神花嘅微酸同時唔會蓋過雪梨嘅清甜原味,素忌廉口感柔滑,同蓬鬆軟綿嘅熱香餅一齊食真係幾夾。洛神花糖漿另上畀大家按喜好添加,亦有食用花、枸杞等點綴,特別係玫瑰花碎可以增加花香。

豆腐芝士蛋糕($48)
豆腐芝士蛋糕($48)

自家製甜品仲有芝士蛋糕同布朗尼,豆腐芝士蛋糕用豆腐同素芝士製作,食落無想象中咁甜,反而係有黃豆同腰果嘅香味,最啱鍾意食少甜甜品嘅朋友。不過始終都係素食版,比起一般芝士蛋糕嚟講口感就無咁Creamy喇。

奇異果羽衣甘藍富士蘋果燕麥奶($48)
奇異果羽衣甘藍富士蘋果燕麥奶($48)

Superfood羽衣甘藍營養豐富但就有陣唔係個個鍾意嘅草青味,呢杯特飲就用奇異果嘅微酸同富士蘋果嘅香甜蓋過,味道甜甜哋容易入口得多。

黃薑粉薑汁鮮奶($38)
黃薑粉薑汁鮮奶($38)


黃薑因為有助抗炎,成為最近流行嘅Superfood,味道辛辣。配搭薑汁鮮奶將辣度減低,入口微甜,帶少少辛香氣。鮮奶指嘅係燕麥奶,所以全素人士都飲得,有麩質過敏亦可以轉做豆奶。

新店亦有售賣店主選物,集餐廳同雜貨店於一身
新店亦有售賣店主選物,集餐廳同雜貨店於一身
新店亦有售賣店主選物,集餐廳同雜貨店於一身
新店亦有售賣店主選物,集餐廳同雜貨店於一身
The Park by Years
The Park by Years
The Park by Years
The Park by Years

The Park by Years
地址:深水埗汝州街132號地舖




文:Cathy
相、片:Calvin Kwok

你可能還想看