雅虎香港新聞 【深水埗美食】大南街文青火鍋Café！兄弟檔棄做時裝轉營私房菜殺出血路
有句講到爛的俗語：山不轉路轉、路不轉人轉。剛進駐深水埗大南街的文青火鍋Café月EVENING，主理人兩兄弟，可謂這句俗語的忠實執行者。由1997年開始，他們哥兒倆，由經營古著開始，到創立自家牛仔褲品牌，再轉營私房火鍋店，輾轉到今天的文青Café，每一步都是見證香港經濟盛衰，每一步無不是路不轉人轉。
【立即讚好】全新 Yahoo Food Facebook 專頁
「冇所謂架，做生意嘅嘢，冇得做就要轉架啦，冇話唔得架，我哋香港人嚟架嘛！打不死架嘛！」老闆阿Jim說來字字鏗鏘，雙眼透火，彷彿電影《Die Hard》中的主角John McClane，儘管身處下風，仍要扭轉乾坤，險境冇有怕，就係不低頭。
超人氣私房火鍋
自問是為食老饕，對月EVENING這名字一定不陌生。對了！就是開在尖沙咀加連威老道一幢舊樓樓上的那間私房火鍋店。龍蝦湯湯底、麻油雞湯底、番茄牛肉粒湯底……中西台式都有，眼花繚亂。火鍋料仲勁，醉蝦隻隻灌醉到蝦身都有酒香，新鮮手切牛爪邊，塊塊雪花紛飛，好食到飛起。最多話題的，還有炸厚切午餐肉、爆脆炸魚皮、黑松露牛肝菌冬菇餃子……連菜藍也砌到一盆花上桌，前菜又來一兜黑松露薯條，就像電影《Die Hard》一樣，高潮疊起，叫人連連驚呼。更妙的是，就連私房西餐都有。
沙律薯條南瓜蟹肉湯北海道帶子配牛油菠菜香辣蒜片大蝦意粉芝士洋蔥焗鮑魚黑毛豬鞍扒配菠蘿巨型美國連骨肉眼扒……竟然做到酒店西餐廳水準，價錢卻只每人幾百蚊落樓，難怪Fans個個死心塌地，視為神聖Best kept secret。「哈哈哈！我哋冇學過架，我哋唔係做飲食出身架，我哋本來做Fashion架！」大佬阿Jim一副懷舊Mode上身咁款。
那舊一懷，就回到1997年。地點在旺角潮流特區，那時Jim和Chris兩兄弟，本來幫家庭做五金生意，因為潮流興古著，二人極欣賞，就入行開古著店。
「唔識架，人哋去泰國入貨，我哋去美國入貨，幾戇居呀！後來搵啲水貨牌子返嚟賣，Supreme水貨都係我第一個入嚟香港㗎。」阿Jim說。
潮人兄弟創品牌
那時剛回歸，經濟暢旺，生意極佳。他們想創自家品牌，就找廠商朋友幫手，自行設計，生產了第一條本土製作自家品牌牛仔褲。「條褲嘅品牌叫Double dog，賣$388-$488一條，平外國貨一半，好好生意，一炮而紅。」他說。
1999年尾，他們搬到加連威老道樓上舖，開了Double brother時裝店，專賣自家品牌產品，除了Double dog，還有Black division等三四隻牌子，是當年潮人心目中追捧的本地型牌。可是好景不會每日常在，2014年，佔中運動開始，經濟大受打擊，樓上時裝店，開始沒生意。朋友跟他說「不如一半做Cafe囉，橫掂你日日喺度，唔好嘥咗個舖。」兄弟倆思前想後，決定放膽一試。
由零開始，用了三萬元改裝。打一半舖位變成Café，時裝保留一半。他們都沒有餐飲經驗，只是細佬Chris閒時也有下廚，最初只能懂甚麼做甚麼，薯條、咖啡、All day breakfast……他們摸着石頭過河，見食物有客人接受，又大膽做多些，請教做酒店朋友，開始做意粉、豬扒、雞翼等輕食。後來有朋友想包場做派對，更開始接單，製作沒有餐牌的私房餐單。「去街市見乜靚就做乜，炸雞翼、煎牛扒，黑松露意粉等等，開始有個初樣。」Jim說。
2015年，他們索性結束時裝業務，把店子完全轉做飲食，牛仔褲監平監賤清貨，阿Jim看着一個時代結束，悲從中來，流下眼淚。「話晒個品牌係我兩兄弟一手湊大，睇住啲褲賣幾廿蚊條，唔怕話你聽，我真係喊咗出嚟。」他說。
打死不離一家人
都說有捨才有得，捨棄時裝業，私房菜生意愈做愈得。除了做西餐，更開始兼營火鍋，沒有經驗不用怕，最緊要有創意，和對品質有要求。湯底和食物，混合了西式，龍蝦湯底、黑松露餃。牛肉海鮮，全部自己去揀，挑最新鮮的才買，回到店仍鮮蹦活跳。「初時唔識一早去，買的都係尋晚嘅死貨。海鮮中午後才到貨，中午去買才新鮮，我交咗唔少學費架。」他說。
香港人，真心愛火鍋，私房火鍋一推出，果然一擊即中，晚晚爆場，成為城中人氣話題，那時飲食圈中，流行一個問題：「你有冇食過月呀？」。轉型成功，以為好景永遠在，始終有鴻運嗎？世事那會咁完美。「有日突然收到信，業主話要收樓，最遲六月要走，我呆咗，真係一盆冷水照頭淋。」Jim說。燒紅了的鐵，插進冷水中，那感覺，讓人氣餒得想喊想放棄。
「今次真係有諗過轉行，真係有諗過放棄。」他說。樓收了，店沒了，剛巧疫情又來了，彷彿連個天都唔鍾意自己。兩兄弟決定沉澱一下，當來個LV，等待上天指引，Don’t worry，Be happy！「結果唞了三個月，日日使錢，喺屋企唔知做乜，決定要做啲嘢。」Jim說。他和細佬，四出睇舖，預備東山再起，本來鎖定尖沙咀。後來發現，深水埗大南街一帶，漸漸形成文青氣候，一切正在變型，碰巧有現舖，齊牌，可以即刻開業，就決定重新開始。11月試業，開始做私房火鍋，做了一個月，日日有單，新知舊雨，紛至沓來。只是好運氣，像曇花一現。
「一開始冇耐，就撞正第四波疫情爆發，政府又實施六點後晚市禁堂食，我哋當堂企咗喺度。」他說。沒夜市，沒火鍋，便轉攻午市。晨早六點去街市買餸，回來洗切，預備午市打仗，香辣蒜片蝦意粉、炸西班牙黑毛豬扒鵝油撈麵、汁燒頂級牛頸脊飯、黑松露牛肝菌意粉……每日做8款左右，貴精不貴多。「收舖又要醃豬扒、煮意粉，半熟再用。九點才收工，做足十二個鐘。」Jim說。
忙還忙，有甚麼比兩兄弟一齊忙更好？就是一家人一齊忙了。今天若你到訪月EVENING，你會發現兄長買餸，細佬做廚，弟婦樓面，老媽洗碗，一家人忙到頭頂出煙，早已聯成一體，分不清是你是我。「家人做嘢，講感情講默契，拗撬梗係有，但家人嘅好處，係拗完可以好番，呢樣嘢好重要。」Jim說。打死不離親兄弟，更何況是一家人。山不轉路轉、路不轉人轉。山和路，其實都是死物，惟有人是活的，是有感情的，是最重要的。
全新訂座平台「Yahoo訂餐廳×Openrice」正式上線！
月Evening
地址：太子大南街124號地舖（地圖按此）
電話：96636345
營業時間：12NN-6PM
更多太子美食推介
【太子美食】太子酒吧魔術救市 首推創意Fusion料理：啤酒BBQ花五腩
【太子美食】時裝設計師開日系車仔麵店 $55十餸麵 麵條都有14款
【太子美食】太子高質Café推介5間：食Brunch打卡嘆咖啡
【今晚食乜好】唔知今晚食乜餸？立即去Yahoo Food 食譜專頁搵靈感
【今晚食乜好】唔知今晚食乜餸？立即去Yahoo Food 食譜專頁搵靈感
>>按此下載<< 全新Yahoo APP，領取最新餐廳優惠、氣炸食譜、自助餐推介、仲有飲食達人教你識煮識食，讓你成為真正全面的吃貨，立即下載！
文、攝：譚偉健
