港女講日:善用emoji! 學日本女生5個短訊技巧

電影《Emoji大冒險》就快上映,估你唔到一堆表情符號都可以做到電影主角!唔好睇少emoji呀,各位剩女食了食粥食飯要靠佢!點解咁講?根據日本網站《恋愛up!》文章,集合5個教女生點樣用LINE發短訊營造可愛感吸引異性嘅方法,多圖少字係關鍵!

1. 符號及emoji

所謂emoji,即係「絵文字」,最初係日本無線通信所使用嘅視覺情感符號,所以本身日本人經常用,發展到而家全世界人都鍾意用!女仔多用emoji及符號,好似講「多謝」時加符號「~」變成「多謝~」,或者後面加個哈哈笑,男人會覺得呢個女仔好nice好可愛,有勇氣繼續text你。

2. 方言

日本各地有唔同方言,女仔可以喺對話好自然咁加入方言,男人會對你增加興趣。雖然香港多數人講廣東話,但係好多人返鄉下都識講幾句福建話、客家話、潮洲話、圍頭話等,隨意加上一兩句方言,引起男生好奇追問「XX用OO話應該點講呢?」,有利打開更多話題。至於火星文如「巧開心」、「禾唔知」呢啲,個人覺得一兩句無傷大雅,太多就未免太港女吧…

3. 唔做作

日本人習慣講嘢婉轉,好少直接表達想法,成日都「あのね…」(咁樣呢…)前「あのね…」後,用日文講會易啲接受,廣東話就硬係怪怪的,對住港男都係做返自己,唔好咁做作比較好!

4. 正面用語

我都唔只一次喺文章提到男人普遍鍾意女人笑、樂觀、畀到人正能量。Message都一樣,盡量揀啲正面字眼,令男人對你印象係開朗活潑,好過成日呻「好煩」、「好嬲」等負面情緒。

5.貼圖

用圖比打字仲好,用得通訊工具傾計交友更加要多圖少字,吓吓大文豪上身長篇大論好嚇人架!原文係講LINE,可以回好多得意貼圖,咁whatsapp除咗emoji呢?咪就係send多啲相畀對方囉,影低一日見聞同對方分享,增加情趣。

圖片來源: https://www.pakutaso.com/

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能