港女講日：唔係迷信! 孕婦4大禁忌有科學根據

現年30歲日本靚靚準媽咪佐佐木希，為結婚一年嘅諧星老公渡部建陀B約5個月，開始見肚。近日相約NHK電視台新劇《Daisy Luck》拍檔夏菜和中川翔子等食好西，仲將眾人捧住燒牛肉嘅合照放上IG，點知居然惹來網友批評!

唔通相機食先都係錯? 非也，原來唔少網民見燒牛肉中間仲咁紅，認為孕婦唔不應該食未熟透嘅食物，連幾位醫生都走出嚟發文解釋，其中松永醫生指出，孕婦唔應該食燒牛肉因為要徹底消滅肉類寄生蟲，需要以67度高溫加熱，而燒牛肉得表面受熱，中間受熱程度大約52-63度，唔能夠完全消滅寄生蟲，如果想食牛，起碼要七成熟先得。

懷孕真係有好多注意事項，一個唔覺意就會影響個胎。唔只飲食方面，生活上都有好多禁忌，唔係迷信，有啲真係有科學根據!

1.雙手舉高過頭

孕婦因個肚越來越大，平衡感會差咗，做一啲需要舉手嘅動作例如曬衫、趷腳，好可能重心不穩而跌倒。

2.拍孕婦膊頭

老人家話人有三把火，分別在頭頂同2個膊頭，比人拍會熄，招來惡運。科學角度係孕婦本來就容易受驚嚇，突然拍佢膊頭好有可能會危及胎兒。

3.去醫院探病

因為醫院病菌多，孕婦抵抗力較弱，好可能會被傳染，所以非必要都會叫孕婦唔好踏足醫院。如果真係非去不去，一定要勤洗手、戴口罩。

4.出席飲宴或喪禮

有人就話孕婦忌去紅事白事係迷信講法，但面對人多事雜嘅場合，加上天氣或場地有太多未知數，而且大肚婆情緒起伏較大，所以唔建議孕婦出席。

圖片來源：IG@nozomisasaki_official