港姐20強水着「胸」戰 陳懿德減16磅凸圍 梁允瑜繼續爆粗

陳懿德齋食雞胸及雞蛋,成功減走肚腩。
陳懿德齋食雞胸及雞蛋,成功減走肚腩。

港姐昨晚公布20強名單,入圍佳麗以泳裝上陣晒身材,當中以陳懿德最有睇頭,勁減16磅依然「胸」猛!至於之前流出爆粗片的梁允瑜亦有得留低,她直認粗口難戒,又承認私下會以粗口跟佳麗交流,夠晒坦白。

應屆港姐以真人騷《We Miss Hong Kong STAY-cation晉級賽》進行,28名佳麗參與為期10天的「Stay Battle」,繼早前有4人被淘汰後,再有4名佳麗包括姜嘉琳、陳詩帆、盧淑儀及馬嘉希出局。

一眾入圍佳麗昨晚以比堅尼Top配半截裙亮相,當中「波霸」陳懿德否認靠「Push up」,問會否覺得着泳衣有優勢,她說:「有佳麗腹肌練得好勁,我冇腹肌,只係減咗個肚腩,由6月到依家減咗16磅。(因為身材好而躋身20強?)堅毅都好重要,入Camp時工作人員安排飯盒畀我哋,我要Keep Fit所以自備飯煲烚雞胸同雞蛋。」

關楓馨改進舞藝

至於梁允瑜早前流出拿着魚蛋爆粗狂數前度的短片,她對於入圍表示感恩及感動,問是否已戒粗口,她坦言:「好難戒,適當時候講適當說話,我話唔講,你都唔信啦!(同佳麗用粗口交流?)老實講真係有,平時喺房入面係私人時間,都會發洩吓情緒。」又指比賽時會控制自己不爆粗,亦會繼續食魚蛋。

而大熱佳麗陳聖瑜與關禮傑女兒關楓馨身材不俗,2人謙稱冇諗過打入20強,關楓馨指爸爸很開心,自認答問題太緊張,跳舞亦有待進步。

梁允瑜有信心在台上不會爆粗。
梁允瑜有信心在台上不會爆粗。
陳聖瑜(右)與關楓馨被視為大熱。
陳聖瑜(右)與關楓馨被視為大熱。
20位入圍港姐,昨晚以水着見傳媒。
20位入圍港姐,昨晚以水着見傳媒。