湯之魂 九龍區火鍋控集合

打邊爐嚟講，湯底絕對係靈魂精髓，一個好嘅湯底，能夠令各種食材同配料變得更加鮮香甜味。今次要介紹嘅兩間九龍區火鍋店，一間主打滋補養顏湯底，另一間麻辣、養生兼備，作君選擇。

炊水薈（油麻地）

打邊爐個個都係邊「炊水」邊吹水。炊水薈每日12點後都有多款雞煲同火鍋選擇，既有麻辣口味，亦有養生款式，就連辛辣程度都有得揀，想同朋友喺九龍旺區搵間坐得耐啲嘅餐廳吹水食嘢，可以諗諗佢。

四川麻辣雞煲

雞煲份量都幾大，適合2-4位享用，辛辣配料全部由四川送運，包括有兩款唔同嘅四川花椒同乾辣椒等，香麻兼備。餐廳選用肉質嫩滑，味道鮮甜嘅三黃雞製作，而且重會喺客人面前即刻炒兩炒，爆香洋蔥，有埋視覺同嗅覺嘅加持，食慾更加提昇。

水魚文昌雞鍋

選用肉質較煙韌嘅野生水魚，同埋文昌走地雞製作，兩者都比較有嚼口，而且互相增加鮮甜香味。師傅喺熬煮湯底後更加入花雕酒，使層次變得豐富，食出陣陣酒香。

花膠雞煲 （大）

平時打邊爐成日都好想飲埋個湯底，但又怕熱氣又怕太鹹，呢個花膠雞煲就可以喇。每煲都有一整隻雞，加6個花膠筒，夠晒足料。花膠更加係預早兩三日已經發定，連埋雞腳、豬筒骨、藥材等熬煮8個鐘，湯底煲到融晒，相當清甜，絕對值得喺未淥任何嘢之前，嗶返碗飲下先~

水煮牛肉鍋

滿缸紅嘅水煮牛肉鍋，單睇色澤已經足夠令一眾辣椒仔女拜倒裙下，深紅色嘅紅油，加埋鋪滿面嘅辣椒，已經為佢嘅刺激做咗預告。水煮醬由師傅自家炒製，牛肉、配料等索盡精華，香辣惹味。

酸菜龍躉鍋

最後要介紹嘅係酸菜龍躉鍋，師傅話特意選上約30斤重嘅龍躉，咁先至會夠多肉，夠魚香。果然不負眾望，厚厚嘅魚片啖啖肉，混埋花椒辣椒同酸菜等，酸辣開胃。

尚膳養顏滋補鍋（旺角）

香港人一年四季都要打邊爐，既然要食，不如食吓啲養生嘅，旺角呢間火鍋專門店以各式真材實料嘅滋補湯底為賣點。裝潢方面深木色為主，好古色古香，座位寬敞以屏風作間隔，私隱度都幾高，打邊爐都打得零舍舒服喇。火鍋配料方面都好高質素，如手切牛肉及手工丸類等，部份食材更可以點半份，就算兩個人食都可以試多幾款！

鴛鴦鍋（尚膳養顏美人鍋＋麻辣鍋）

招牌養顏美人鍋以金華火腿、老雞、赤肉及多款滋補藥材熬製而成，鍋內仲有埋烏雞同埋女士們最愛嘅桃膠，味道清甜濃郁，營養豐富又夠晒滋補！如果想試多一個湯底，餐廳推薦美人鍋配上麻辣鍋，呢度嘅麻辣鍋係台灣風格，香辣帶麻唔會嗆喉，可以直接飲用，加埋台灣直送鴨血及吸湯嘅冰豆腐，好足料。

滋潤魚雲靜心鍋

平時鍾意飲魚湯，呢個滋潤魚雲靜心鍋就啱晒。湯底以川芎、白芷、天麻、新鮮魚頭、竹絲雞、老薑、白胡椒粒及當歸等藥材熬成，藥材味唔會蓋過魚嘅鮮味，有頭風及偏頭痛人士飲就最適合。不過溫馨一提此湯底不適合孕婦食用呀。

酸菜白肉鍋

如果想食啲開胃嘅湯底，酸菜白肉鍋由自家醃制酸菜配上新鮮豬骨湯，味道酸香濃郁令人愈食愈開胃。鍋內有埋五花肉及寛粉條，前者肉味濃厚帶有陣陣酒香，酸菜湯底中和返五花肉嘅油膩感；後者就煙韌Q彈，就咁食個鍋嘅食材已經好滿足！

薑母鴨湯

台式傳統湯底，具有暖身及軀寒效果，食落滋而不膩、溫而不燥。以新鮮米鴨、豬骨、老薑及多款上等藥材如桂枝、川芎、人参及紅棗等大火熬足12小時，適合平時手腳冰冷人士飲。

椰子雞鍋

清甜嘅椰子雞鍋以新鮮椰青水、老椰子肉及海底椰慢火熬煮，特別一提餐廳選用湛江走地雞，呢種雞係食穀米及草長大，生長速度慢，所以肉質嫩滑，雞味香濃，簡單點一點沙姜醬汁已經好好食。

心動不如行動！有興趣就快啲約埋三五知己去嘆下美食！快啲bookmark定啦！

*以上圖片只供參考，所有食品以實物為準. 食品供應因餐廳而異