湯怡爆追求者香閨陪慶生

東方日報
·2 分鐘文章
湯怡(右)表示喜歡成班朋友睇戲約會,衛詩雅則鍾意一個人睇戲。
湯怡(右)表示喜歡成班朋友睇戲約會,衛詩雅則鍾意一個人睇戲。

藝人湯怡昨日出席活動,甩拖近2年的她表示最近有朋友為她介紹異性,一班人睇戲食飯又為她在家中慶祝生日,感覺舒服,但暫時不想跟追求者二人世界相處。

湯怡、衛詩雅、關智斌、李靖筠、楊天宇及艾妮等昨日出席英皇戲院(將軍澳康城)傳媒招待日,湯怡自爆最近有朋友為她做媒:「朋友好擔心我,經常介紹男仔,我以前好抗拒,依家佢哋醒咗,會約一班人睇戲食飯,夾個男仔坐我隔籬。(試過幾次?)一次啫!一班人舒服啲。(覺得個男仔點?)相處吓先。(對方有冇再約你?)有,但我想一班人。(對佢有好感?)感覺舒服,佢係圈外人。(準備好展開新戀情?)順其自然,可遇不可求,專注工作先。」本月17日生日的她,獲朋友在家為她慶生,問到追求者是否參與其中?她坦言:「以往全女班,今年夾雜咗啲異性。(佢有冇送禮物?)冇刻意,成班人夾錢送花。」但她強調不會讓異性獨留其香閨。

至於衛詩雅笑言沒有朋友為她介紹,又自言性格大膽,故要做其身邊人一定要很強:「我去睇恐怖片都係一個人,亦唔怕曱甴、蛇同蜈蚣。」

關智斌自薦做軒仔嘉賓

另外,關智斌對於好友張敬軒下月在紅館開騷,是疫情下重返紅館開騷第一人,他表示可喜可賀:「對好多人嚟講好有意義。(但入場人數限一半!)可以開到騷,意義大過一切。(你會唔會自薦做嘉賓?)會,我個人面皮好厚,但對方搵唔搵我係一件事。(佢最近請咗新工人姐姐,冇啖好食?)都啱,食得清淡啲對佢喉嚨同身體好。(你帶啲好嘢畀佢食?)雖然佢喺社交網站寫到好哀怨,但其實好享受。(佢犯賤?)我不作回應。」

關智斌認為疫境之中能開騷意義重大。
關智斌認為疫境之中能開騷意義重大。
艾妮、李靖筠、楊天宇齊撐英皇將軍澳新戲院活動。
艾妮、李靖筠、楊天宇齊撐英皇將軍澳新戲院活動。