《溏心風暴之家好月圓》「中仔」溫家恆變身六嚿腹肌型男 你認唔認得？

由於資深演員李香琴（琴姐）病逝，無綫安排喺深夜時間重播《溏心風暴之家好月圓》，等大家可以回顧「嫲嫲」琴姐嘅精湛演技。當年除咗睇一班老戲骨之外，飾演夏雨和李司棋嘅6個仔女（陳豪、林峯、楊怡、黎諾懿、陳法拉及溫家恆）亦非常值得觀眾留意。

溫家恆（Vincent）喺咁多個仔女中，可以話係最生面口嘅一個。雖然佢知名度唔高，不過戲份絕對唔比同劇藝人少。佢喺劇中飾演夏雨和李司棋孻仔「中仔」甘永中，原本係喺英國留學，不過因為佢無心向學，所以偷偷地返香港搵荷媽。

喺英國出世及長大嘅溫家恆，畢業於英國倫敦大學學院，曾於美銀美林及高盛工作，20歲出頭人工已高達3萬。不過佢喺2006年放棄高薪厚職加入無綫，成為《港生活‧港享受》及《東張西望》主持之一，間中被派到英國採訪英國藝人。佢喺2008年被《溏心風暴之家好月圓》監製劉家豪睇中，飾演「竹升仔」甘永中一角，之後佢亦參演過劇集《刑警》及《洪武三十二》。另外，佢亦試過出單曲加入樂壇，於2009年時更獲得新城勁爆新登場男歌手獎。之後，佢甚少活躍於幕前工作。

現年37歲嘅溫家恆雖然冇再拍劇，不過就轉戰幕後及模特兒界，大家都可能喺平面廣告見到佢，不過就可能未必認得佢，因為佢嘅身型已經唔再排骨，已經變身成為擁有六嚿腹肌嘅型男。睇佢社交網站嘅相片，可以睇得出佢熱愛戶外運動，更曬出一身健康膚色，同佢喺《溏心風暴之家好月圓》個樣有好大分別。

按此下載全新應用程式Yahoo APP，並以Yahoo電郵免費登記成為會員，即時可完成簡單任務賺取Ypoints，憑分即可換領不同獎賞！ 新人更可即時換領限量新人禮，立即下載！