《溏心風暴之家好月圓》盤點仔女近況 陳法拉進軍荷里活/楊茜堯升呢做人母...

《溏心風暴之家好月圓》盤點仔女近況 陳法拉進軍荷里活/楊茜堯升呢做人母...
溏心風暴之家好月圓》盤點仔女近況 陳法拉進軍荷里活/楊茜堯升呢做人母...

資深演員李香琴(琴姐)於上周一病逝,無綫於深夜時間重播《溏心風暴之家好月圓》等大家可以回顧「嫲嫲」琴姐嘅精湛演技。當年劇集播出時,口碑及收視俱佳。觀眾除咗睇一班老戲骨之外,飾演仔女「家/好/月/圓/慶/中/秋」嘅陳豪、林峯、楊茜堯、黎諾懿、陳法拉、溫家恆及鍾嘉欣亦獲得觀眾高度關注。事隔13年,當中有人係無綫小生花旦、有人已經離巢、更有人進軍荷里活,而家就同大家睇下佢哋嘅近況啦!

陳豪(飾演甘永家)
陳豪喺劇中飾演大仔甘永家「阿卡」,係一個愛家嘅乖乖孝順仔,幫荷媽喺Jo飽嗰邊照顧細佬,不過就成日掛住炒股。現實生活中嘅陳豪亦係一位好老公好爸爸,2010年佢因拍攝劇集《心戰》與陳茵媺(Aimee)相戀,二人2013年巴黎結婚。婚後育有三名囝囡,陳豪繼續努力拍劇及打理自家品牌咖啡生意,而Aimee就減產,專心相夫教子,一家五口過著幸福生活。陳豪有份主演嘅《陀槍師姐2021》就嚟出街,有興趣嘅話就記得留意啦!

《溏心風暴之家好月圓》截圖
《溏心風暴之家好月圓》截圖
陳豪
陳豪

林峯(飾演甘永好)
林峯喺劇中飾演「管家仔」甘永好,非常顧家、孝順、有承擔又專一,一直留守餅鋪幫荷媽手做餅。佢暗戀「阿秋」于素心(鍾嘉欣飾)直至阿秋與凌至信(王浩信飾)分手,佢哋先正式喺埋一齊。1999年入行嘅林峯,多年嚟塑造咗唔少令觀眾印象深刻嘅經典角色,例如《尋秦記》趙盤/嬴趙盤/嬴政、《使徒行者》爆Seed、《溏心風暴》Alfred及《溏心風暴之家好月圓》管家仔,成為無綫一線小生。《使徒行者3》係林峯相隔6年嘅回歸之作,可惜都係未能令佢榮升視帝,計埋今次佢已經提名過17次視帝。至於感情方面,林峯與內地模特兒張馨月於2019年結婚,上年9月老婆誕下囡囡,榮升做人父。

《溏心風暴之家好月圓》截圖
《溏心風暴之家好月圓》截圖
林峯
林峯

楊茜堯(飾演孫皓月)
楊茜堯(前名楊怡)喺劇中飾演性格外剛內柔嘅「攞女」孫皓月,佢自細被荷媽收為養女,所以一直都非常感激荷媽嘅照顧。另外,佢一直暗戀阿卡,最終二人成功修成正果。楊茜堯喺1999年開始參與劇集拍攝,多年嚟有唔少經典角色,例如《賭城風雲》Mimi、《溏心風暴之家好月圓》孫皓月、《宮心計》麗妃及《On Call36小時》魚仔等等,更憑《名媛望族》康子君一角勇奪視后寶座,成為無綫當家花旦之一。。佢喺拍攝《On Call 36小時》時被同劇藝人羅子溢(前名羅仲謙)力追,譜出姐弟戀。婚後楊茜堯開始減少幕前演出,並誕下囡囡羅翊心「小珍珠」。早前,楊茜堯應內地影視公司邀請,以8位數酬勞夫妻檔拍劇,參演由梁家樹監製嘅都市商戰劇《家族榮耀》,相信唔少觀眾會好期待再睇佢嘅演出。

《溏心風暴之家好月圓》截圖
《溏心風暴之家好月圓》截圖
楊茜堯
楊茜堯

黎諾懿(飾演甘永圓)
黎諾懿喺劇中飾演甘永圓,曾喺泰國醉駕撞死人,所以有痛腳喺紅姨(米雪飾)手上,成為紅姨嘅棋子。現實生活中嘅黎諾懿中學畢業後就參加無綫藝員訓練班,入行後參與《皆大歡喜》、《戀愛自由式》及《當四葉草碰上劍尖時》,開始為人熟悉。2004年與林峯、吳卓羲、陳鍵鋒、黃宗澤、馬國明組成「奧運六星」,可惜星途平平,直至處境劇《愛·回家》中飾演馬壯一角成功入屋。近年佢轉型喺節目中教煮嘢食,今年佢與陳敏之主持嘅《今晚請客》獲得「最佳非戲劇節目」。喺感情方面,黎諾懿與落選港姐李潔瑩於2014年結婚,婚後育有仔仔「小春雞」,家庭生活十分美滿。

《溏心風暴之家好月圓》截圖
《溏心風暴之家好月圓》截圖
黎諾懿
黎諾懿

陳法拉 (飾演甘詠慶)
陳法拉喺劇中飾演孻囡甘詠慶,小時候因為扁桃腺手術而弄傷聲帶結果成為啞妹,深得全家人愛錫,最後更與Kelvin(楊天經飾)結婚。陳法拉於2005年參選華姐獲得亞軍,入行後隨即備受力捧,多年嚟參演過唔少經典劇集,例如《溏心風暴》、《師奶兵團》、《公主嫁到》、《巾幗梟雄之義海豪情》及《衝上雲霄II》等等,成為無綫當家花旦之一。2013年離開無綫嘅陳法拉,用四年時間於美國修讀戲劇碩士課程,之後獲得荷里活賞識,除咗喺HBO迷你劇《The Undoing》與奧斯卡影后妮歌潔曼(Nicole Kidman)和曉格蘭特(Hugh Grant)做對手戲之外,佢仲有機會拍攝Marvel超級英雄電影《上氣》(Shang-Chi and the Legend of the Ten Rings)。至於感情方面,佢喺2019年與法籍男友Emmanuel Straschnov結婚,事業同愛情兩得意。

《溏心風暴之家好月圓》截圖
《溏心風暴之家好月圓》截圖
陳法拉
陳法拉

溫家恆(飾演甘永中)
溫家恆喺劇中飾演嘅「中仔」甘永中,自細被紅姨送到英國讀書,不過因為佢無心向學,所以偷偷地返香港搵荷媽。喺英國出世及長大嘅溫家恆,畢業於英國倫敦大學學院,曾於美銀美林及高盛工作。2006年加入無綫,除咗為《港生活‧港享受》及《東張西望》擔任主持之外,佢亦有參與劇集拍攝,包括《溏心風暴之家好月圓》、《刑警》及《洪武三十二》。2009年更闖入樂壇,獲得新城勁爆新登場男歌手獎。現時佢已經甚少活躍於幕前工作,轉戰幕後及模特兒界。另外,佢嘅身型已經唔再排骨,搖身一變成為擁有六嚿腹肌嘅型男。

《溏心風暴之家好月圓》截圖
《溏心風暴之家好月圓》截圖
溫家恆
溫家恆

鍾嘉欣(飾演于素心)
鍾嘉欣喺劇中飾演「阿秋」于素心,係紅姨與前夫所生嘅女,與至信分手後,就嫁俾青梅竹馬嘅甘永好,得到大家嘅祝福。鍾嘉欣係2004年華姐冠軍,入行後即被無綫力捧,多年嚟參與唔少劇集拍攝,例如《皆大歡喜》、《法證先鋒》、《溏心風暴》及《珠光寶氣》等等,深得一眾網民喜愛。佢喺2015年下嫁脊醫Jeremy,婚後甚少參與幕前工作,專心照顧家庭,一家四口幸福滿瀉。直至上年,佢回流返香港接拍劇集《兒科醫生》,唔少網民都話好期待嘉欣BB嘅復出之作。

《溏心風暴之家好月圓》截圖
《溏心風暴之家好月圓》截圖
鍾嘉欣
鍾嘉欣

按此下載全新應用程式Yahoo APP,並以Yahoo電郵免費登記成為會員,即時可完成簡單任務賺取Ypoints,憑分即可換領不同獎賞! 新人更可即時換領限量新人禮,立即下載!