溫裕紅離巢TVB久違露面 身形消瘦戴頭巾出席林建明飯聚

香港新冠肺炎疫情緩和，政府喺上周（21日）起放寬部份社交距離措施，包括所有餐廳可以恢復堂食至晚上10時及4人一枱，唔少市民都與家人及友人相聚享用晚餐。林建明（大姐Ming）喺噚日上載與友人食晚飯嘅照片到社交網站，相中見到久未露面嘅溫裕紅（Esther），雖然佢嘅身形望落比以前消瘦，不過精神不俗仲幾好笑容。

林建明（大姐Ming）上載與友人食泰國菜嘅照片，網民們除咗笑頸上掛住毛巾嘅大姐Ming似地盤收工去食飯之外，網民亦非常關心曾患癌嘅溫裕紅嘅身體近況，因為佢戴上頭巾同睇落比以前消瘦。喺接受傳媒查詢時，溫裕紅就話自己已經離開娛樂圈，淨係想做個普通人，唔想被打擾同關注。

溫裕紅讀完演藝學院後便加入無綫，20多年嚟演出經驗無數，除咗為《都市閒情》等節目擔任主持之外，佢亦有參與唔少劇集拍攝，但都以閒角居多，例如《刑事偵緝檔案III》 、《創世紀》、《老婆大人》、《巴不得媽媽...》、《溏心風暴3》、《BB來了》、《降魔的2.0》、《那些我愛過的人》及《食腦喪B》等等。今晚嗰集嘅《食腦喪B》將有溫裕紅嘅戲份，佢喺劇中飾演江慶（鍾志光飾）嘅老婆王麗美，喪B三姊弟仲認定江慶係佢哋親父，搞到王麗美嬲爆爆，話要驗DNA進行親子鑑定。喺兩年前，溫裕紅選擇離開效力23年嘅無綫，原因係公司要求佢減超過一半人工及要簽附加條約，所以佢決定唔簽。另外，溫裕紅喺2005年不幸患上乳癌，並接受過六次化療，2006年完成大手術後，至今已經康復，唔使再食藥，不過每年要定期做身體檢查。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！