【滄海遺珠】無綫欠佢哋一個「視帝」 最多竟然被提名16次都食白果

《萬千星輝頒獎典禮2018》將於周日（16日）舉行，視帝視后寶座都成為網民熱門討論的話題。不過唔知大家有冇留意，總係有幾個藝人差咁啲攞獎運，次次都同視帝視后寶座擦身而過，不如我哋一齊回顧有邊位男藝人係視帝嘅滄海遺珠啦！

馬國明

講到視帝滄海遺珠，相信唔少人都會諗起馬國明。馬明喺初出道嘅時候，係奧運六星中人氣最低嘅一位。但經過多年努力，佢由茄喱啡做到男一位置，大家對佢嘅努力同演技都有目共睹。佢第一次入圍最佳男主角提名係憑05年劇集《同撈同煲》，至今已經被提名咗11次，但每次都係食白果。尤其係《On Call 36小時》嘅張一健及《降魔的》嘅馬季，唔少網民都認為佢係視帝最佳人選，可惜都係同視帝擦身而過，都為佢大感不值。馬明一向深得民心又有觀眾緣，佢已經成為大家心目中嘅民間視帝。

林峯

99年入行嘅林峯，出道以嚟遇過唔少好角色，例如《溏心風暴之家好月圓》管家仔、《使徒行者》爆seed及《雷霆掃毒》Happy Sir等等嘅演技得到大家認同，深入民心。至今林峯一共被提名為最佳男主角16次，而成功躋身5強度有8次咁多，但可惜嘅係每一次都同視帝之名擦身而過，唔少人認為佢絕對有資格登上視帝寶座。難怪林峯都覺得心灰意冷，轉戰內地搵實行搵人仔，14年《使徒行者》成為告別作。

馬浚偉

馬浚偉（馬仔）有份參演嘅劇集都深受歡迎，好似有《十月初五的月光》飾演司徒禮信、《洛神》飾演曹植、《帝女花》飾演周世顯、《守業者》嘅潘家揚。至今馬仔已經被提名咗13次，今年重頭劇《宮心計2深宮計》，佢喺劇中飾演李隆基都深受觀眾愛戴，不過今年佢就冇份競逐「視帝」，結果令到唔少網民都替佢不值。討論區上更有網民推斷因為馬仔為香港開電視主持同埋製作《同理·繼續走》有關。

馬德鐘

入行已經23年嘅馬德鐘演技一向被受肯定，佢同林峯一樣被提名為最佳男主角16次，佢曾經被寄予最希望得到獎項嘅是2006年的《鳳凰四重奏》，06年競爭都好激烈，但最後竟然由小成本嘅偶像劇《天幕下的戀人》中嘅鄭嘉穎得到獎項，結果全城譁然。而馬德鐘今年台慶劇《跳躍生命線》中飾演消防總隊目「在哥」麥在田，感動好多網民，更憑劇集角逐「最佳男主角」及「最受歡迎電視男角色」兩個獎項，唔少網民都好想佢拎到視帝呢個獎。

張智霖

張智霖被提名為最佳男主角6次，不過好多時都被視為視帝大熱，可惜每次都大熱倒灶。好似13年，佢憑《衝上雲霄》飾演「Cool魔」機長顧夏陽，本身對視帝寶座明顯志在必得嘅佢，可惜最後被《My盛Lady》嘅黃子華奪去，僅獲「我最喜愛的電視男角色」。

吳啟華

相信好多網民對吳啟華印象，最深刻嘅劇集一定係《妙手仁心》系列飾演嘅程至美醫生，入行至今，除咗《妙手仁心》嘅程至美之外，佢都飾演過唔少經典角色，例如《壹號皇庭V》Alex、《美味情緣》馬友及《黑夜彩虹》樂天生等等，可惜嘅係喺佢事業顛峰時期，偏偏遇上羅家良同歐陽震華等強敵。