滬式新天堂

用得「天堂」作為今次飯局嘅重心,聰明嘅你一定知道我有特別嘅推介!今晚我哋喺位於銅鑼灣嘅上海菜館「狀元王家沙」,歎合時蟹粉之外,我仲即席示範既招積又出色嘅「冰火」食法!不過,喺詳述特色食法之前,我再特別推介今晚兩位嘉賓Evelyn H.同Kelly Cheung,佢哋係model界嘅新勢力,加上新美酒「馬諦氏」(Matisse),充分體現「新.天堂」!

我今晚特別邀請兩位靚女Kelly(右)同「天使蛋糕女郎」Evelyn(左),同我一齊品嘗「馬諦氏」,大歎上海特色菜!

美酒伴佳餚

有一啲女讀者反映過,話我喺「金牌飯局」中推介歎住我嘅「黃湯」威士忌品嘗佳餚,對於佢哋嚟講實在太man,哈哈哈!雖然我係威士忌嘅好朋友,不過講到專家,就要請教吓今晚另一位嘉賓,「威馬洋酒」嘅Managing Director劉迪文(Don)嘞!

「其實不論男女,一般喺飲威士忌嘅時候,我哋東方人同外國人嘅品嘗方法已經好唔同。外國人會將着眼點放喺嗅覺上,即係用鼻去聞去鑑賞酒香;而東方人多數會着重味覺多啲,所以唔少人對威士忌嘅評語會係『揦喉』、『好哽』咁樣。」

請得Don嚟擔任嘉賓,佢同生意拍檔Eric、Ernest亦有備而嚟,佢哋帶住兩支分別係15年同19年嘅「馬諦氏蘇格蘭威士忌」(Matisse Single Malt Scotch Whisky),諗住同我以及兩位美女分享吓,哈哈哈!美酒配合滬式佳餚,真係一大享受!

既然有女讀者認為威士忌「太man」,我想聽吓兩位model對威士忌嘅觀感,結果實在驚喜,擔任過天使蛋糕女郎嘅Evelyn原來係fans,「我鍾意Whisky,尤其係同一班朋友坐低談心,飲住Whisky歎住cigar(雪茄)係最relax嘅!」

至於主力喺天橋上行fashion show嘅中美混血兒Kelly,因為其父嘅關係就享受過威士忌之味,「我daddy會同我一齊飲,不過Whisky嘅味道對我嚟講都係太strong。」

3味前菜各具特色,我就對香糟鵝肝嘅評分最高,你一定要試!

花雕蛋白蒸蝦球($108)蝦爽蛋白滑,又一好菜!

花生辣子肋排($72)以川式煮法炮製,嗜辣者必點菜式。

小茴香燒肉配蝴蝶包($78),以茴香燒嘅豬肉滑溜而冇肥膩感覺。

據Don講,「馬諦氏」普遍有15年(右)同19年選擇,15年就啱新入門嘅朋友試,而19年就係一啲中高階威士忌fans所喜愛。

開啟天堂路

咁就啱嘞!我即請兩位model歎住適合佐酒嘅特色涼盤,試一試15年「馬諦氏」嘅味道,一試之下,Evelyn同Kelly異口同聲話:「唔……好smooth呀!相比起其他,呢隻係易入口好多,可以taste到酒嘅香味,而唔會有揦喉嘅感覺。」

喺兩位model品酒期間,侍應已經端上清炒蟹粉,我一直都有講,熱辣辣嘅蟹粉加埋凍冰冰嘅魚子醬,食入口嘅感覺,「冰火」交集,特別過癮。今晚我知道有蟹粉菜式,就特別帶備私家魚子醬,一於即時同在座嘅嘉賓分享!

一湯匙嘅熱蟹粉,加上一茶匙嘅凍魚子,係「黃金比例」,為各嘉賓炮製好呢味「冰火」特別菜式後,我哋齊齊「啪」入口,再加上一小杯19年「馬諦氏」,哈哈哈!簡直係highway to heaven,帶我哋去到美味天堂!

我親自為Kelly(中)及Evelyn(右)炮製「冰火」蟹粉配魚子醬,你睇佢哋幾期待?

御品龍井茶皇雞($208一隻)皮脆肉嫩,係呢晚嘅另一驚喜。

清炒蟹粉(時價)剛好合時,配合我自備嘅魚子醬,雙重享受。

3位猛男Ernest、Don及Eric(左至右)喺商場上並肩作戰,有美食,我一定預埋佢哋!

新面孔煮意

兩位model對於我嘅推介食法,讚不絕口,而兩位原來喺廚藝上都有一定心得,Kelly話:「我好鍾意煮嘢食,以前喺Chicago就煮西餐多,返到嚟香港,喺daddy嘅指導之下都有煮小菜,特別係蒸水蛋,我會用3隻蛋加1/3碗水,再喺『發』蛋後等到蛋漿上嘅氣泡冇晒,先至拎去蒸,咁蒸出嚟嘅蛋就又嫩滑又唔會太鹹!」

Evelyn就肯花多啲時間,「我鍾意用燜呢個方法煮餸,哈哈!因為我懶,將材料一次過放入煲,煮幾個鐘頭就OK吖嘛!」

而佢對西班牙菜仲情有獨鍾,「以前我喺馬德里住過,嗰度嘅海鮮飯係好好食嘅,雖然喺香港搵唔番呢一種特別嘅味道,但係我對西班牙菜式已經有特別嘅喜愛!」 美食無分國界,今晚我哋有最好食嘅上海菜,對女士最smooth嘅靚酒,冇理由唔乾杯慶祝,乾!

今晚有美酒、佳餚、好酒腳,加上我特別預備嘅「冰火」推介,真正係highway to heaven。

蜜汁雙方($118)已成為滬菜不可或缺嘅菜式,今晚自然唔會例外!

鵝肝鮮肉小籠包($48)比傳統小籠包多一份心思。

一人手執一個鵝肝小籠包,Kelly(左)同Evelyn(右)一臉滿足。

着重新風格

講得係「Highway to heaven」,我一定要畀大家睇吓嘉賓們試過我嘅「冰火」蟹粉魚子醬後嘅即時反應,Kelly就係最有feel嘅一位(下圖)。

而講到feel,「狀元王家沙」亦有其特別風格,揭去後頁你會睇到餐廳特色點心,創意值得加分!

狀元王家沙


地址:銅鑼灣恩平道28號利園二期1樓115-116號舖
電話:2722 6222

下期預告:

與品酒名家歎矜貴鐵板燒

東周網 - 滬式新天堂︰http://www.eastweek.my-magazine.me/index.php?aid=8294