「滴滴外賣」點先啟動到日本外賣無限列車

滴滴外賣宣布登陸日本福岡，要在外賣業戰國時代啟動賺錢無限列車，滴滴究竟可以點樣做？

形容日本外賣業步入戰國時代並唔誇張，除了剛登陸的滴滴外賣，現時當地對手包括Uber Eats、出前館，仲有Wolt及大家熟悉的foodpanda。不過對手多唔代表無得做，滴滴外賣勝在資本實力強勁，只要針對日本消費者需要，仍有機會後來居上。

早前有人氣日本綜藝節目探討疫情下日本外賣熱潮，不過從街訪的消費者意見，原來日本消費者對幫襯外賣未算熱衷。首先係收費貴，唔少受訪者要畀外賣費，倒不如自己行去餐廳自取。其次係衞生問題，受訪者指外賣員三唔識七，對外賣員消毒衞生措施缺乏信心，所以都係自己出動買外賣較安全。值得一提係街訪中有一班少女表示好憧憬外賣服務，皆因她們身處的鄉郊城市尚未有外賣服務，更認為有外賣員周街走係城市時尚度指標之一。

1.瘋狂價格戰

針對以上三項消費者需要，滴滴外賣第一步係打瘋狂價格戰，破天荒推出頭三十次外賣免費，即係免費嗌足一個月外賣。泡沫經濟爆破後日本消費者最實際，大撒幣打免費牌就不再嫌貴而勇於嘗試外賣服務。

2.力谷衞生形象

第二步係提升衞生形象，基本一步係外賣員全民檢測，另外公布與日本企業研發銀離子抗菌外賣服，再在外賣員身上配備攝錄機，當外賣員到餐廳拎外賣時，可以即場直播予落單消費者睇，外賣員並無亂擺外賣兼做足消毒措施。做到咁，即使奄尖如日本消費者應該都會信心大增。

3.農村包圍城市

第三步係發動農村包圍城市戰略，既然大城市對手多，而鄉郊城市少女原來對外賣服務如此憧憬，倒不如先押注發展鄉郊市場。鄉郊市場另一優勢係有唔少荷包豐厚的銀髮族，仲有手握家庭財政的主婦客。首先推出針對銀髮族的簡化版叫外賣兼代購日用品App，並同步提供落單熱線，即可以取得銀髮族消費者歡心。至於主婦客，除了與餐廳合作推出儲印花換領時裝、家品、家電品牌現金券，又或推出專為主婦口味而設的外賣套餐，如午後甜品set。這類點子成為話題的話，反而激發到大城市消費者對外賣服務的「購買欲」，達到農村包圍城市的營銷效果。

【下載Yahoo財經APP】獲全球超過1700萬人信任的美股投資工具，跨平台同步你的投資組合，一APP掌握TSLA、AAPL、AMZN等美股最新走勢。