5間睇演唱會前醫肚餐廳推介 - 紅館篇

要大嗌一句：「紅館，我返嚟喇。」因為疫情而被迫中斷嘅張敬軒演唱會，今晚重於可以重啟喇。之後紅館嘅檔期都係show接show，關心妍、欣宜、全城搶飛嘅Mirror等陸續嚟緊，除咗唔好空肚食早餐，都唔好空肚睇演唱會，尤其是而家啲餐廳10點就要閂門，睇完show冇得好似以前咁食宵夜㗎喇！介紹幾間喺紅館附近嘅餐廳畀大家，開show前搵食啦！

速食台式飯團 阿杏飯團

如果真係好趕時間嘅話，可以諗諗呢間台式飯團，飯團細細嚿但好鬼足料，一定飽肚，而且拎走食都得，唔使驚話會遲入場。飯團主要用紫米製作，口感濕潤煙韌。選擇都幾多，推介當然係新宿燒汁牛扒飯團，牛扒鮮嫩，搭埋肉鬆、生菜等配料都幾清爽。如果覺得睇show已經好貴要慳啲食嘅，最平$33芙蓉鹹蛋飯團啦，有驚喜架都。

同紅館距離：步行約12分鐘

特色歐陸輕食 B’hood

上年年尾先開café，就算係多年紅館演唱會嘅常客都未必食過，可以有啲新鮮感。餐廳主力供應歐陸輕食，同埋咖啡、特飲等。油封鴨脾酥皮窩夫嘅鴨脾以低溫慢煮手法處理，厚肉但軟嫩，仲要有肉汁，夾埋太陽蛋同窩夫一齊食，鹹香入味。西班牙蛋餅亦有唔同款式，蟹肉龍蝦汁、京蔥烤鴨絲等都唔錯，蛋味夠香。另外要特別介紹下特飲Pista-chiiiii-o，mocktail嚟，加入自家製開心果奶同玄米茶調製，清香又香甜，坊間唔多見呢。

同紅館距離：步行約13分鐘

足料番茄薯仔湯底 蒙麵

紅磡長期都超人氣嘅車仔麵人龍店，所以如果想食呢間記得要預多少少時間啊。無論係湯底、麵底同配料都各具特色～首先講吓湯底，最受歡迎嘅番茄薯仔湯真材實料，滿滿番茄蓉同薯仔，好有家的感覺，飲曬成碗都唔頸渴。另外都有重慶麻辣湯底同喇沙揀。配料有唔少店家推介嘅都幾出色，溏心滷蛋用鴨蛋製成，蛋味香濃又唔會過鹹；蠔仔煎蛋嘅蠔仔都好新鮮飽滿。麵底方面推介招牌蒙麵，質感有啲似烏冬加薯粉嘅混合體，又幾特別！未完㗎，除咗車仔麵一定要試埋招牌蜜汁叉燒串，熱辣辣半肥瘦叉燒配上香甜蜜汁，係享受呀。

同紅館距離：步行約13分鐘

日式小品料理 米気

家庭風味日式料理小店，簡約裝修同擺設，都幾啱打卡！主打日式一汁多菜，飯、主菜、冷熱配菜、飲品、甜品都係任意配搭，價錢就視乎揀咩配菜喇。飯唔係普通白飯咁簡單，首先選用日本國產米，更可選擇醬油蛋飯、明太子飯、蟹肉蟹膏飯等，就咁食都已經有驚喜。主菜方面推介紅酒汁煮牛肋條及牛肉壽喜燒，前者軟腍入味，後者香甜牛味香濃，送飯一流！甜品招牌米氣雪糕帶有陣陣米香，清新不甜膩。

同紅館距離：步行約11分鐘

足料班戟漢堡 Hero’s Friday

趕時間想快食，呢間只供立食、主打外賣嘅buger店都係唔錯嘅選擇。最特別係佢哋可以加錢將漢堡轉成班堡，班堡由香甜鬆軟嘅班戟製成，甜甜鹹鹹嘅配搭令人愈食愈上癮！英雄漢堡係招牌之選，足足有11CM咁高，入面有兩大塊5oz安格斯漢堡牛肉，牛味突出又Juicy，配埋兩片芝士、煎蛋、煙肉、蕃茄、生菜同特製醬汁，超滿足！

同紅館距離：步行約14分鐘

文: Yanica、Kar