演唱會銷情︳ToNick Serrini 一票難求 Supper Moment仲有飛 修哥莫文蔚紅館show賣成點？

疫情稍為降溫，演唱會即使入座率有限制，至少都叫開得成，樂迷有娛樂，幕後有工開，大家開心！

觀眾「餓show」已久，又係咪個個演唱會都賣個滿堂紅？我地為你check咗多個演唱會網上售票平台，睇吓邊個仲有飛賣︰

莫文蔚

呢個星期五就開show，全部山頂位已經賣晒，頭2場仲有少量$680/$980，反而尾場仲有飛剩，希望靠口碑谷得起。再唔係……又出過張「驚喜」海報囉。

胡楓

89歲修哥破紅館最高齡開show紀錄之作，銷情似乎唔錯，＄580剩少量，山頂位冇晒！

陳輝陽x女聲合唱

陳輝陽作品首首大熱，女聲合唱好幾次演出都好評如潮，今次仲要係最後演出，一開售就秒殺！

黎明

Leon喎，仲要concert ＋talk show，唔爆至奇！

Supper Moment

早前自嘲「唔識玩社交媒體」但又拍片回應網民批評，證明佢地真係唔識，得罪網友同樂迷。6月開2場Star Hall，而家仲有飛賣，對比2018年3場紅館極速售罄真係今非昔比。

ToNick

同樣係樂隊，同樣開Star Hall，但係遲一個禮拜開show嘅ToNick，已經賣晒飛，仲要有贊助商冠名支持。兩三年時間，真係可以改變好多嘢。

Serrini

「呢條女」仲癲，早排先開完麥花臣，而家轉去Star Hall開3場，要識答問題先有得優先訂飛，家陣都賣晒！

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！