澳洲大火燒毀棲息地 夏天再臨保護樹熊刻不容緩
大家應該仲記得去年澳洲野火,持續多月並燒毀約半個英國大嘅森林,有無數野生動物死亡。事隔差唔多一年,澳洲又迎來另一個夏天,亦即係話又到野火嘅季節,澳洲各界人士都非常關注,希望慘劇唔會再次出現。
官方一早已警示,因為全球極端氣溫情況不斷出現,今年同樣有機會出現大火。早前一眾救援組織包括「Science for Wildlife」已經將去年救起嘅樹熊,治療過後重新放回樹林棲息地,不過由於大片樹林被燒毀,當局進行多項措施確保樹熊可以有個合適環境生存,包括空投樹熊最愛尤加利樹嘅種子,每日空投4萬粒種子,希望加快樹林重建速度。其實除咗野火之外,一直以來樹熊另一大殺手就係「披衣菌」,感染到嘅樹熊會出現結膜炎等致命併發症,就算最後痊愈都好大可能會盲眼,非常恐怖。其實早前有保育組織就話如果各界唔盡力保護樹熊,可能2050年樹熊就會正式滅絕呢。
相關文章: