雅虎香港新聞 灣仔新開手工拌麵專門店 推介$98蟹皇拌麵+油撥辣子魯肉biang biang麵
灣仔嘅上班族們又多一個新食堂喇！莊士敦道嗰頭最近有一間附近較少見嘅手工麵店進駐，原來係人氣餃子店餃掂嘅新line～餐廳主打拌麵及湯麵，淨係麵底嘅種類都有好多款揀，所有麵類都係搵麵粉廠製作，天然唔會有梘水味，灣仔區嚟講價錢合理，有興趣嘅朋友要去試吓！
麵底有五款選擇，包括擔擔麵、蛋麵、biang biang麵、菠菜麵及白布湯闊麵，就無論你係咩口味都迎合到。
油撥辣子魯肉biang biang麵（$55）
加入滷肉及自家製油潑辣辣椒醬，香辣惹味，食得辣嘅朋友可以挑戰吓特辣！biang biang麵來自陝西，傳統會較厚身同粗，而餐廳就稍作改良，會薄身及幼啲，食落輕盈、有咬口及掛汁。
鎮店蟹皇拌麵（$98）
用平民價錢都食到蟹皇拌麵！用大閘蟹肉及蟹黃製作，無加蛋黃及蟹油，加入自家製蟹醋食就無咁膩喇。配埋吸汁細滑嘅擔擔麵食就最夾！
高湯小雲吞蛋麵（$43）
小雲吞配上蛋麵，蛋麵用雞蛋及鴨蛋製作，多咗一份蛋香，口感順滑。白皮小雲吞皮薄，一口一粒，味道清淡啲，成碗麵由頭食到尾都好舒服。
嫩雞白布湯闊麵（$68）
Idea來自上海嘅嫩雞煨麵，但就改用自家製白布湯闊麵，幼滑吸湯，而湯底就係白雞湯底，濃而不膩。
乳鴿配擔擔麵
原隻乳鴿配上擔擔麵，乳鴿入味有肉香，而擔擔麵都好惹味。
秘製香糟醉雞（$58）
香糟汁亦係自家製作，加入話梅及水果，有酒香得嚟帶點果香，有層次幾特別。
極品陳年龍鳳檸蜜（$30）
選用陳年柑桔蜜，坊間好多都係三年下，而呢度就一定用 8-16年嘅柑桔蜜，回甘果下係潤嘅唔係澀嘅。
香芋鮮奶（$28）
露面手工拌麵料理
地址: 灣仔莊士敦道55號地下A號舖
