灣仔新開洋食屋 主打冰鮮肉鐵板手工漢堡

喺第三波疫情爆發底下，依然有新餐廳開幕！灣仔呢間洋食屋，主打鐵板手工漢堡扒，而且仲有多個抵食午巿套餐。

招牌漢堡扒配自製蔬菜紅酒牛肋條醬汁，打開錫紙就立馬聞到肉香啦，識食嘅話一定係食咗面頭嗰嚿仔牛肋肉先，牛味香濃，再食漢堡扒，點埋甜甜嘅自家製醬汁，滿口肉香同肉汁。

其他唔同配搭包括有德式漢堡扒配太陽蛋、燉煮芝士漢堡扒等，後者更以3款芝士：Mozzarella、巴馬臣同車打芝士混成，成塊扒都畀芝士包圍住！

選用冰鮮肉，而唔係急凍肉作為免治肉嘅原材料，可以話係罕有嘅做法，但因為餐廳本身隸屬全港最大嘅和牛入口商，因而可以較低成本獲取質素較高嘅肉。佢哋每日嚴選和牛同日本豚肉唔同嘅部位，調配比例，再以人手搓揉。煎之前又會再輕拍十幾下，擠出多嘅空氣，令到肉質比一般食到嘅漢堡扒更柔嫩同有彈性。順帶一提，餐廳設開放式廚房嚟，大家可以觀賞到師傅點樣整塊扒啊~ 煎嗰陣又會用錫紙包住嚟煎，所以肉汁冇乜流失到，食落就好juicy啦。

另外都有啲肉扒嘅選擇，例如澳洲產穀飼厚切牛柳扒，就以低溫慢煮再煎香，口感軟腍。

Grill Tajimaya
地址：灣仔港灣道30號新鴻基中心2樓2A-1號舖

文、相、片：Kar