炎明熹收起招牌劉海 《聲夢》學員：你係邊個呀？

無綫節目《聲夢傳奇》雖然已經圓滿結束，但熱潮依然未減，就連即將舉行嘅畢業演唱會加開至4場都火速售罄，人氣一時無兩。呢日林君蓮就晒出與一班《聲夢》學員，包括炎明熹（Gigi）、鍾柔美（Yumi）等人遊主題樂園嘅Vlog，公開大家私底下最真實一面。出發時一班女仔相當準時，男子組林智樂（Felix）及孫漢霖（火雞）卻遲大到，終被罰於路中心大叫宣傳《聲夢》，場面搞笑。而佢哋相處亦非常融洽，其中Gigi戴帽現身，收起招牌劉海，即被大家笑指「認唔到」，仲問「你係邊個呀？」相當老友。

另外，曾被導師李克勤「踢爆」戀情嘅火雞及文凱婷（Aeren）亦不斷被提起緋聞，期間有人指目睹火雞挨向Aeren，之後大家玩到身水身汗時，火雞又叫Aeren聞吓佢身上有冇臭味，互動曖昧。雖然2人強調並冇拍拖，但眾人一於少理，當正佢哋「真情侶」一樣，Yumi更搞笑稱呼2人為「姑丈、姑媽」，令佢哋嘅「戀情」水洗都唔清。