為「譚仔廿五周年」創作主題曲 林家謙難忘被整蠱 傳承勁辣傳統

·2 分鐘文章
林家謙為活動創作主題曲,並由6位「譚仔女聲合唱團」的成員和唱。
林家謙為活動創作主題曲,並由6位「譚仔女聲合唱團」的成員和唱。

林家謙昨日出席譚仔雲南米線廿五周年活動,難忘中學首次幫襯時被同學整蠱食辣,要即刻飲冰水降溫,現時他仍有傳承此整蠱之道!面對熱情如火的七仙羽翹實不放,他笑言沒有被嚇親,更獲對方贈言條命非常好!

歌手林家謙昨日以「譚仔廿五周年宣傳大使」身份,出席「譚仔廿五載情如初見啟動禮」,同場有譚仔國際集團主席兼行政總裁劉達民先生。家謙為活動創作了廿五周年主題曲《二十五小》,包辦詞曲唱,並由6位「譚仔姐姐」組成的「譚仔女聲合唱團」和唱。家謙大讚她們有天分,唱得很好,很開心與她們合作。活動上播出MV,片中見家謙來到深水埗總店,他表示中學有段時間在深水埗讀書:「第一次食譚仔係喺深水埗總店,寫歌前都特登返去熟悉嘅街道,搵番對深水埗嘅印象。」

被七師傅讚好命

他又笑言難忘首次食譚仔被同學整蠱:「佢哋叫我食小辣,話十小辣係最辣,我信咗,點知辣到飛起,要即刻買冰水,所以之後帶唔同朋友去食,都會咁樣整蠱佢哋傳承落去。」

大合照時堪輿學家七仙羽(七師傅)見到家謙即表現心心眼,面紅紅翹實他不放,對此家謙笑言沒被嚇親,並獲對方指條命非常好。問到可有要她指點迷津何時有女友?他笑言:「冇,我都唔心急,不過頭先佢都有問我有冇拍拖。(佢想自薦?)唔知呀,佢應該個個都咁問㗎啦!」為人貼地的他又謂如果揀女友,會想一起吃地道食物。

睇好張敬軒攞獎

講到樂壇頒獎禮將至,張敬軒睇好他攞男歌手金獎,家謙即謙稱:「唔會啦,佢謙啫,都開心認可我今年嘅作品,但唔會有壓力,我睇好佢同姜濤。(自己呢?)我睇好自己作曲方面,因為今年專心做幕後,產量多咗,反而幕前嘅作品就少咗。」講到他之前在頒獎禮攞獎攞到「黑面」,問到未來可會再重現?他解釋:「上次唔係黑面,係因為諗太多攞獎後嘅憂慮,依家學識享受當下。(覺唔覺今年競爭大?)反而覺得今年氣氛熱鬧,大家一齊支持香港樂壇。」

眾主禮嘉賓一起為活動進行啟動儀式。
眾主禮嘉賓一起為活動進行啟動儀式。
林家謙以宣傳大使身份出席,並與劉達民合照。
林家謙以宣傳大使身份出席,並與劉達民合照。



我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能