無戴罩踢街坊判監2周 薛影儀點樣一年內成為亞視一姐？

37歲「亞視一姐」薛影儀（阿儀）上個月被爆喺寓所樓下無戴罩，有街坊拍片公審時阿儀起腳踢人，事後警方根據網片資料起訴阿儀一項普通襲擊罪，案件今日提堂，法官判阿儀入獄2周。

舊年4月阿儀仲係一個對娛圈有興趣嘅中女，未夠一年已經經歷「星途」大起大跌兼入獄。當亞視都可以永恆，阿儀做一姐點會無可能？

薛影儀02年中學畢業，本來靠做兼職維生，做過飲食及社區中心，試過因為冇戴口罩被人炒。舊年想入行嘅阿儀報名TVB藝訓班，但係首輪就出局，後來佢見亞姐放寬年齡限制，於是搏一搏參加，仲專程買三點式去面試。就係呢套粉紅泳衣，阿儀著住佢以一副厭世臉見傳媒，自此平地一聲雷，更有人大呼「阿儀不紅，天理不容」！

阿儀IG隨即有3萬人follow，亞視睇準機會，先頒個亞姐最佳努力獎過佢，然後仲簽約2年，令阿儀立即成為一姐，並且話咁快有job接，拍過電影《愛．還記得》。亞視幫阿儀搞直播網上音樂會，五音不全嘅佢居然引來12萬人收睇。

身為一姐，但係阿儀一次拖都未拍過，仲承認係黃花閨女，不過試過主動向心儀男生表白，結果換來被block下場。

希望紅得太快嘅阿儀，趁呢段時間沉澱一下再出發，加油！

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！