無綫將拍港版《華燈初上》 楊明獲欽點演男一 與姚子羚、蔡潔有感情線

台灣網劇《華燈初上》於Netflix上架後贏盡口碑，正當傳出編劇杜政哲正規劃第四季之際，無綫電視將開拍港版《華燈初上》，有指製作將更大型更豪華，例如會落重本搭建多個奢華場景。

據悉，港版《華燈初上》由王晶擔任監製，係繼2019年播出嘅《荷里活有個大老千》後，王晶再度製作嘅電視劇集。港版《華燈初上》背景圍繞80、90年代香港大型夜總會，有指男主角起用楊明；其他演員包括姚子羚、傅嘉莉、蔡潔、楊明女友莊思明、應屆落選港姐陳聖瑜及王晶愛將陳法蓉。另有指，姚子羚將於劇中飾演「見習媽媽生」，與楊明有唔少感情戲，楊明亦會周旋於姚子羚及蔡潔之間。不過網民對於港版《華燈初上》就唔多睇好，仲指無綫成日翻拍或抄橋：「要睇華燈，點解唔直接睇Netflix」、「見到王晶配楊明已經夠趕客」、「江郎才盡，只懂copy cat」、「你拍出嚟有人地一半水平先講啦」、「tvb拍完都係同佢平時d查案認親劇一樣效果，做唔到華燈嘅回響」等等。

楊明之前因「不小心駕駛」罪成，正等待上訴，港版《華燈初上》係佢停工一年多後首次嘅拍劇機會；對於楊明仍涉及官司一事，王晶表示選角方面係由無綫安排，故此無綫有信心的話，自己都無問題。不過，楊明就指自己未接獲無綫通知。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！