無綫花旦走完下一個又一個 呢幾位有冇機會頂上？

今年無綫再次出現離巢潮，花旦方面先有李施嬅喺年頭離開，亦有傳田蕊妮同胡定欣喺年尾約滿後亦會相繼出走，兼且有李佳芯疑似被雪藏。咁無綫仲有邊啲女星可以頂上呢？

2013年參選港姐嘅蔡思貝當選之後，隨即參與過好多戲劇作品，但係就得唔到觀眾嘅青睞，紛紛批評佢演技太生硬，把聲太刺耳呀！不過蔡思貝接受大家意見，近年仲積極跑步、修身變靚及努力改善演技。 喺《踩過界》中不惜扮醜飾演火雞姐，令好多觀眾刮目相看，更勇奪當年「最佳電視女角色」獎，都算係無浪費一番努力，受到大家肯定。

待播及拍攝中劇集：《機場特警》及《使徒行者3》

生完bb就即刻復出嘅陳敏之，唔知係咪外型成熟咗，飾演多咗好多女強人嘅角色，以往陳敏之多數只係做配角，例如有《怒火街頭》嘅「索腿天后」，但最近已經成功擠身上第二女主角。令大家最印象深刻嘅當然係《溏心風暴3》入面同唐文龍嘅不倫戀，師奶們睇到好鬼嬲呀，仲話佢係女人公敵，睇嚟敏之嘅演功的確進步不少，大家都睇得好投入呀！

待播及拍攝中劇集：《法證先鋒IV》

胡說八道會嘅成員走下一個又一個，好多之前力捧嘅女星都相繼離巢，淨底嘅黃智雯應該可以話係有大好機會俾佢上位，去年嘅《三個女人一個因》黃智雯要變身成為三個截然不同嘅性格，算係攞正牌比佢發揮。不過唔知係咪高層始終覺得佢未夠火喉，所以將套劇安排於周日播出，所以收視都係平平。

待播及拍攝中劇集：《十八年後的終極告白》、《降魔的2.0》及《使徒行者3》

從主持到劇集，無綫對張曦雯（Kelly）嘅待遇算是非常好，喺外國長大嘅kelly ，回流返香港之後一路都做主持工作，鬼妹仔性格非常開朗，fit 爆身形加上精緻外貌，一下子就成為新一代索爆女神。無綫咁識做梗係即刻俾機會佢擔正幾套劇啦，令佢成功入屋！雖然張曦雯超得觀眾緣，人氣亦到爆燈，但係都有負評㗎，演技麻麻就不在話下，更有網民批評佢係「再造人」，同以往嘅樣子有出入呀！

待播及拍攝中劇集：《木棘証人》