無綫ViuTV對撼 嚟緊有咩新劇好睇?

·5 分鐘文章

每年11月都係無綫台慶嘅大日子,無綫都會選出大製作及大卡士劇集做台慶劇。有指今年三套台慶劇製作同卡士都唔簡單,分別係《木棘證人》、《踩過界II》及《使徒行者3》。不過有指今年ViuTV似乎想加入戰團,同無綫搶收視。ViuTV早前宣布推出三套自家製劇集,包括《熟女強人》、《暖男爸爸》及《男排女將》,睇嚟今年最後3個月會有唔少精彩劇集等住大家收睇。

《木棘證人》
《木棘證人》

有指警匪懸疑喜劇《木棘證人》將接檔《C9特工》喺10月19日播放,雖然演員卡士唔算強大,不過就搵嚟好耐冇拍無綫劇嘅羅仲謙、張曦雯、韋家雄及張文慈等人主演,劇情主要圍繞一位行為怪異嘅證人李浩帆(韋家雄飾),雖然佢睇到事發經過,不過就因為自身問題而無辦法表達出嚟,所以搞到負責呢單案嘅「升呢Sir」高力基(羅仲謙飾)困難重重。另外,羅仲謙仲會同張曦雯及張秀文有感情戲。

《踩過界II》
《踩過界II》

《踩過界》喺2017年播出時叫好又叫座,王浩信更憑此劇飾演盲俠一角榮升視帝。有傳喺播完內地劇《錦繡南歌》後,無綫將會喺11月9日播出與愛奇藝合資嘅《踩過界II》,劇集繼續由「鐵三角」王浩信、張振朗及蔡思貝擔任主持,雖然今輯李佳芯(Ali)無份參與,但就有女神張曦雯及好戲之人秦沛等人加入。劇情講述「鐵三角」繼續為弱勢市民發聲,女盲俠邵美娜(張曦雯飾)突然出現,仲周旋喺盲俠同gogo之間,令到佢哋面臨瓦解。除此之外,邵美娜仲牽引出一段盲俠不為人知嘅過去,原來佢嘅背後係由人操控,而呢個人就係盲俠嘅師父簡紹宏(秦沛飾),不過佢哋喺好多年前因為理念不同而決裂。原本邵美娜視盲俠係競敵,不過之後慢慢被盲俠嘅人格魅力所征服,仲開始唔相信師父簡紹宏基嘅理念。

《使徒行者3》(徐榮IG)
《使徒行者3》(徐榮IG)

由無綫同企鵝影業聯合製作嘅警匪臥底劇《使徒行者3》,將會安排喺《木棘證人》後播出,劇集由林峯、袁偉豪、蔡思貝、苗僑偉、黃翠如、馬國明及許紹雄等人主演,淨係呢個卡士已經夠晒吸引力。劇情講述爆Seed(林峯飾)繼續為刑事情報科執行任務,佢除咗係臥底之外,佢仲係阿兜(蔡思貝飾)嘅警方聯絡員。而卓凱(苗僑偉飾)喺出獄後,選擇與老婆莫羨晴(江美儀飾)開咖啡店,不過就面臨被黑幫追殺,之後仲游走黑白兩邊世界。馬國明今次喺《使徒行者3》中飾演大反派魏德禮,喺上一輯結尾就已經聲言會為阿哥魏德信(陳豪飾)復仇,相信大家都會好期待馬明飾演奸角。

《熟女強人》劇照
《熟女強人》劇照

ViuTV方面,劇集《熟女強人》已經播放中,劇集卡士強勁,搵嚟「金馬影后」吳家麗、「無綫視后」胡杏兒、吳千語、沈卓盈、陸詩韻、何佩瑜、曾樂彤及傅穎等人主演,劇情以現代女性寫實心態做題材,透過女主角們去探討現今女性所面對嘅難題,包括「雪卵」、「爭撫養權」、「同性戀」、「性上癮」、「換妻」、「爸爸去哪兒」及「脫單」。雖然大家係睇緊ViuTV,但劇集演員及整體感覺都好似睇緊無綫咁,所以唔少網民都嫌「TVB味」濃,更有人留言問TVB嘅編劇係唔係過咗檔?!

《暖男爸爸》
《暖男爸爸》

《暖男爸爸》將會緊接《熟女強人》喺10月26日播出,將會正面對撼《木棘証人》。劇集搵咗鄭中基及張可頤主演,原來佢同張可頤曾經喺2000年拍過無綫劇集《緣份無邊界》,不過當時佢哋就冇對手戲,今次佢哋終於有機會交手。劇情主要講述單親爸爸阿榮(鄭中基飾)獨力照顧囝囝「暴龍哥」,阿榮因老婆生前買咗保險,所以認識咗保險顧問芷明(張可頤飾),之後佢哋慢慢成為無所不談嘅好朋友。之後,芷明對阿榮由憐生愛,二人最終開花結果。

《男排女將》
《男排女將》

喺《暖男爸爸》大結局後,ViuTV將會安排播放青春勵志劇《男排女將》,即係將會與《使徒行者3》正面交鋒。劇集由鄧麗欣(Stephy)、顧定軒、一班MIRROR及ERROR成員主演,明顯係想吸引一班後生觀眾。劇集以前香港女子排球代表隊成員蔣家瑜作為藍本,主要講述King(顧定軒飾)及Bobby(Anson Lo飾)等人原本係甲一排球隊隊員,不過因身高未能達標嘅關係被逐出球隊。而Stephy飾演嘅蔣家瑜因幾年前嘅重大打擊,令佢失去信心。當佢哋遇上後,幾位年輕人命運改寫,而蔣家瑜更重新愛上排球,成為香港第一位男子排球女性教練。