爆隊友曳曳!Lokman AK自薦做「大叔CP」咀嘴

·2 分鐘文章
AK與Lokman有興趣拍HeHe劇,會否重演「田牧CP」的浴室之吻?
AK與Lokman有興趣拍HeHe劇,會否重演「田牧CP」的浴室之吻?

人氣男團MIRROR正副隊長Lokman與Anson Kong(AK)感情要好,互相扶持,笑言可向「田牧CP」挑機,如果拍《大叔的愛2》,即使要錫錫亦不介意!身為隊中要員的他們已習慣孭起重擔,但笑言成員仍各有不聽話的地方,會幫忙分擔壓力。

Lokman及AK首次合作推出新歌《虎道門》,直言相識以來從沒拗撬,亦沒有私下比較,一直都互相扶持及欣賞,AK說:「例如我欣賞佢喺台上嗰份冷靜、淡定,佢就欣賞我好放。」2人感情要好,問到會否想挑戰Anson Lo及Edan的「田牧CP」?AK即笑說:「我哋係《大叔的愛2》。(如果開拍,真係OK?)如果有機會搵我哋拍都幾開心,體驗唔同嘅人生,應該幾得意。」Lokman亦同意:「演繹多啲唔同角色,經歷多啲唔同生活、感受都正。」問到能否接受錫錫?他們互望一眼後,Lokman笑說:「都OK,為藝術而犧牲!」AK打趣說:「你盡量唔好帶真感情啦!」

新歌MV中,Lokman除衫騷肌,AK卻錫身沒除,他笑言這是角色要求:「我驚如果除埋嘅話,我哋會走錯咗去HeHe劇情路線,所以都係着番件衫!(幾時可以見到你騷肌?)嚟緊12月會有個騷,希望到時畀心機,有嘢睇就畀大家睇吓啦!」

攝時間食包補眠

2人是隊中的正副隊長,問到壓力會否很大?Lokman坦言:「一定有,因為底下有班兄弟睇你頭,就算情況唔需要,但某啲嘢都要督促自己做,有時訪問我一定要正經啲。」AK亦說:「我喺隔籬睇住佢多,如果佢嗰下攰或者Miss咗,我就幫佢補埋嗰啲嘢。不過依家好多隊友都會幫手分擔壓力,呢幾年大家默契愈嚟愈好,成長咗好多。(仲有冇唔聽話?)間唔中。(邊個?)大家各自有唔聽話嘅位啦!」Lokman之前曾在節目《調教你MIRROR》大呻做隊長迷失自我,他指已放下以前的重擔,現時會轉換心態面對,變得更加輕鬆。

對於姜濤日前出席活動時體力不支暈倒,Lokman表示已習慣工作忙碌,現時學會偷時間休息:「冇時間食飯,會叫朋友、助手幫手買定幾個包,得閒食幾啖,唔使埋位就補眠。」

擔任MIRROR正副隊長的Lokman與AK(右)互相提點,做隊友的後盾。
擔任MIRROR正副隊長的Lokman與AK(右)互相提點,做隊友的後盾。



我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能