獨家專訪:2億元打造最強喬峰 甄子丹嚴選「阿朱」 禁人工美女埋身

甄子丹功夫了得,勢必將喬峰絕學耍得淋漓盡致。(設計圖片)
甄子丹功夫了得,勢必將喬峰絕學耍得淋漓盡致。(設計圖片)

「宇宙最強」甄子丹將接拍2億元巨製武俠片《天龍八部之喬峰傳》,為了營造不一樣的感覺,他花了大量時間做前期工作,並於內地多個名城睇景攞靈感。女主角方面,子丹堅拒「人工美女」,希望找到有演技、氣質清純的女演員,不排除海選捧新人!

甄子丹一向喜歡嘗試不同挑戰,早前決定接拍由王晶及鄭偉文執導的電影《天龍八部之喬峰傳》。子丹除了飾演男主角「喬峰」,還會擔任監製。昨日該片官方概念海報於內地正式曝光,更連美國權威電影雜誌「The Hollywood Reporter」亦有報道,各界非常關注今次拍攝。據知,該片投資額接近2億元。

偕老婆四出睇景

子丹昨日接受本報獨家訪問,坦言考慮了數月才接拍,被老拍檔王晶的誠意與胸襟打動:「之前我客串過《倚天屠龍記》嘅張三丰,其實我對佢嘅拍攝唔係最滿意,所以今次佢搵我拍戲,我同佢講要放手畀我搞。佢之前都見過我監製好多電影,好放心,所以就達成咗今次合作。」

電影由經典武俠小說改編,子丹花了大量心思設計角色,之前與老婆汪詩詩到大理、青城山等地遊玩,除了趁放假陪老婆外,更四出睇景及做資料搜集攞靈感,可見他對電影的熱誠,他說:「今次我好想畀觀眾一個新嘅視覺衝擊,同埋拍出一種情懷,保留到原著嘅味道,又可以迎合現今觀眾嘅喜愛,所以我花咗好多時間去設計角色、劇本,同埋不斷研究歷史,因為呢個經典武俠小說,其中一個吸引之處就係同歷史掛鈎,我希望各方面都兼顧到。」

與王晶約法三章

故事以「喬峰」為主幹,女主角「阿朱」由誰參演則暫未有定案。子丹已向王晶約法三章,堅拒「假面女星」演出,他說:「女主角一定要以演技行先,同埋要真實嘅面孔,個樣唔好假,卡士反而唔係咁重要,只要有演技、氣質合適就可以。(如果圈中冇合適,會唔會考慮海選?)會,依家唔少公認好演技嘅一線藝人都係海選搵出嚟,所以有可能。」

電影將於7月在橫店開鏡,之後到山西雁門關、鏡湖等地取景,昨日公布的官方概念海報原來別具心思,海報中的中文片名據知由內地知名女書法家許靜書寫,她是張藝謀電影的「御用」書法家,《英雄》及《影》等皆出自其手筆。

《天》片海報曝光,極具氣勢。
《天》片海報曝光,極具氣勢。
甄子丹陪太太四出遊玩,順道睇景。
甄子丹陪太太四出遊玩,順道睇景。