獨家消息:入行20年 再突破自我 張敬軒搶攻影壇 孭飛賣「笑」

張敬軒拍新片發揮搞笑本領,令人非常期待!
張敬軒拍新片發揮搞笑本領,令人非常期待!

橫掃樂壇、廣告及KOL界的歌王張敬軒,據知已鎖定新目標,將強勢進軍影壇,為度身訂造的笑片擔正男主角!他放下歌王身段,反客為主向導演要求試鏡,希望憑技能取勝,不想欺場。

張敬軒上月剛完成《The Next 20》演唱會,顧名思義將為下一個20年的演藝事業展開拚搏,他曾被網友形容為「被歌唱事業耽誤了的喜劇演員」,而本報收到消息,他將接拍一部笑片並擔正男一!雖然角色是度身訂造,但他自知演戲方面經驗不多,為免貨不對辦,主動向電影公司提出讓他先進行Casting。

軒仔昨日親口承認將接拍新片,表示要對投資者、導演及製作單位等負責:「我唔想因為套戲公司有份投資,自己就有例外,所以為咗確定導演同監製都覺得我係合適人選,我堅持劇本初稿確定後,同其他演員一樣,去做咗Casting。」據知電影改編自韓國一部笑片,暫定8、9月開拍,其他角色人選仍在物色中,軒仔說:「我都好期待仲有咩其他人腳,可以同佢哋擦出更多火花。」

與女角有親熱戲?

他憶述當日電影公司表示有個劇本想給他看,事前沒有透露太多:「話入面有個角色好啱我,我睇完晒劇本之後,電影公司同導演先話想我做呢套戲嘅男主角,聽到之後我係好開心,好感恩有呢個演出機會,自己一路都想喺電影方面發展。」早前他在ViuTV劇集《940920》以重量級彩蛋嘉賓身份登場,令觀眾大為驚喜,雖然只是客串幾分鐘戲,但已非常搶鏡,如今戲癮大發,他說:「其實當時已經有好多歌迷Inbox問我會唔會再拍劇,雖然歌手先係我嘅本業,但之前有演出過舞台劇,亦有其他拍戲嘅經驗,最重要都係遇到好劇本、好角色、好團隊,今次我同導演開會傾過劇本後,自己都好鍾意,好喜歡呢個角色。」據知片中有女角,但未知是否有親熱戲,他說:「劇本仲修改緊,現階段我都唔清楚,到時大家留意啦!」

《軒公敲碗》拍第二季

軒仔下半年除了拍戲外,其自家製、深受觀眾吹捧的《軒公敲碗》系列,過百萬點擊收看屬平常事,故第二季即將開拍,他將再度親自邀請圈中男神、女神及人氣偶像合作,更絞盡腦汁度橋,身兼多職一腳踢!雖然演唱會剛剛落幕,但在一片搶飛熱潮中,不少粉絲都跪求他明年再開騷,極之享受舞台演出的他亦心郁郁,但每年做一次演唱會怕觀眾會覺得欠缺新意,同時有意作出新嘗試作突破性演出,音樂劇及Talk Show都在其考慮之列。

《軒公敲碗》系列深受歡迎,曾邀得林明禎亮相。
《軒公敲碗》系列深受歡迎,曾邀得林明禎亮相。
軒仔對上一部演出的電影是《燦爛這一刻》。
軒仔對上一部演出的電影是《燦爛這一刻》。