王卓淇翻唱張天賦《反對無效》遭內地網民大彈歌藝：下次别唱了

2014年港姐亞軍王卓淇（Erin），入行後星運平平，上年離巢無綫後轉戰內地做歌手，除咗推出單曲《甜蜜送達》之外，佢仲不時喺抖音拍片翻唱大熱歌曲，最近佢就翻唱張天賦（MC）嘅《反對無效》。雖然王卓淇非常有自信及信心地唱出歌曲，不過內地網民就唔多賣帳，大彈歌藝未到家，仲叫佢唔好再唱。

喺片段中，王卓淇以藍色性感吊帶小背心上陣，並翻唱MC張天賦的歌曲《反對無效》 ，期間佢仲話呢首係佢上年最愛嘅粵語歌，仲邀請網民一齊唱。不過一班網民聽完之後，紛紛留言大彈佢嘅歌藝，例如「唱得唔錯，下次唔好再唱啦」、「首歌好聽，但你將首歌唱到。。。都係算啦」、「没有感情啊兄弟」、「的確有唱k感覺」、「唱得…難以形容， relax，唔好感到尷尬」、「我的天…」、「你最好聽果句就係 ye e ye」、「還是好好選美吧」、「係好聽，請下次唔好唱啦」、「王走音」及「下次别唱了」等等。

30歲嘅王卓淇喺廣州出世，出身富裕家庭嘅佢，爸爸係護膚品生產商。佢自細參加過唔少選美比賽，直至2014年終於圓夢奪得香港小姐亞軍。2016年參加完演藝進修班後開始拍劇，《愛情食物鏈》係佢第一套參演嘅劇集，劇中角色經常著住熱褲小背心，成功獲得觀眾關注。雖然之後佢拍劇唔多，不過角色令網民留下深刻印象，例如《我瞞結婚了》紀可愛、《十二傳說》鄭曉盈及《那些我愛過的人》龔芊芊等等。去到上年，佢離開無綫，並於10月喺IG宣布推出單曲，要實現做歌手嘅夢想。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！