王君馨樂壇插班生預咗坐冷板

王君馨演員形象根深柢固,但原來並非樂壇初哥。
王君馨演員形象根深柢固,但原來並非樂壇初哥。

新城昨日舉行頒獎禮記者會,宣布今年將在12月30日復辦實體頒獎禮,周柏豪對此安排大感開心!而王君馨就踩過界殺入樂壇,自爆原來不是新人,亦不介意到時坐足全晚冷板櫈!

《新城勁爆頒獎禮2020》昨日舉行記者會,共有近40個歌手單位出席,包括周柏豪、陳柏宇、菊梓喬、王君馨、泳兒、鄭欣宜、Aka、Cheronna等,連同工作人員,現場有過百人,歌手4人一組隔開坐,有些就戴上透明口罩。新城知訊台執行總監程凱欣透露今年復辦實體頒獎禮,計劃在商場舉行,不招待觀眾入場,但商場內的人士可以睇到,暫定頒獎禮進行約2小時,頒發50多個獎。

柏豪不一樣的生日

對於舉辦實體頒獎禮,柏豪大感開心:「好耐冇接觸頒獎禮,上年都係網上或錄製,自己都有出歌,可以同歌迷有交代。(有冇信心攞獎?)都有,今年推出嘅歌成績好好。」提到日前是其生日,他笑言與家人、囡囡野餐慶祝:「人生過咗30幾個生日,之前生日冇乜感覺,今年就好有感覺,生咗個女,加埋疫情好耐冇去室外。」講到囡囡即將1歲生日,他透露有意將囡囡之前百日宴收到的6位數利是捐作慈善。

而今年殺入樂壇做歌手的君馨就自爆原來不被歸類為新人,因為2014年已為英皇出福音碟。問到首次出席頒獎禮可有信心攞獎?她笑說:「我知道唔係新人之後,信心即刻降低,好似第一日入學已經係4年班,不過好開心終於成為獨立歌手。(驚唔驚頒獎禮坐足成晚冷板櫈?)唔介意,正如10年前第一次去台慶心情好興奮,今次係抱住學習嘅心。」

陳柏宇多人怕中招

至於陳柏宇就坦言復辦實體頒獎禮固然開心,但都擔心多人:「長期都有種感覺驚自己中招。(擔心會傳染畀個女?)係呀。」他透露囡囡剛上N班,要暫時停課2周,又謂囡囡雖然上學開心,但之前一接她放學就爆喊:「因為佢太掛住爸爸,搞到我好心痛。」而欣宜就預告暌違5年將再推出個人大碟,現時積極經營網上頻道。

周柏豪很高興復辦實體頒獎禮,期望一切可重返正軌。
周柏豪很高興復辦實體頒獎禮,期望一切可重返正軌。