雅虎香港新聞 王宗堯：只想讓他們知道，我也在一起
7月1日立法會門外，一架掛著中港牌的豪華房車停在迴旋處附近、封鎖線前。藝人王宗堯 （Greg）上前探問：「佢係個爸爸，話想嚟搵番個仔。佢話個仔喺裏面，但打唔到俾佢。我問你知唔知個仔喺邊，佢話可能喺好入面；我再問佢會唔會嘗試入去搵佢，但唔好叫佢走，陪吓佢，都係好好嘅溝通。」
低調現身 只為與大家同行
Greg 有參與七一遊行，也有進出「煲底」，家人亦有給他致電：「咪話去咗銅鑼灣買嘢，都有出出入入，無講大話呀。」他笑一笑說，大家都各有崗位，亦希望自己有勇氣和能力，站在年輕人的崗位。「我哋可以做嘅係保護佢哋、back up 佢哋，make sure 佢哋有機會可以同我哋一齊打呢場咁長嘅仗。」他說支援崗位亦需要人手：「當日好多人義載，除咗載物資，也幫手接啲人走，因為真係好危險；當晚離開時都諗，而家係咪《十月圍城》（2009年陳德森導演）嘅香港。」
他說，知道後來有四位義士要死守立法會議事廳時，覺得很心痛：「唔想有咁樣嘅犧牲，當唔知（社會運動） 要打幾耐至成功，我哋想留住更加多嘅人喺度，因為犠牲咗一個人，就會少一個人。」 後來一班示威者，包括許多位「小妹妹」趕在警方死線前抬走四位義士，Greg 不禁說：「勇，係去『煲底』救人出嚟嗰啲小朋友 。」他非常佩服他們的勇氣，看著 Facebook 有post 拿那情景與《Avenger: Endgame 》最後一幕比對，由心讚他們很「萌」，也感覺到他實在很投入於這場運動中。
有別於2014年的雨傘運動，這次「反送中」沒有領導單位，大部分參與者都非常年輕。「年輕人睇嘢、諗嘢都無我哋成人咁複雜，但諗番起，每個人都後生過，都有一團火，好單純咁對社會有個期望。」對於許許多多的批評，Greg 指不能說他們沒有錯，因為他們是有破壞：「但佢哋係有去保護某啲嘢，佢哋係用比較克制嘅方式，去進行一次行動。」事實勝於雄辯，他們沒有失去理性、沒有向警察吐口水、沒有圍女記者：「佢哋唔係嗰種殺昏了頭、顛喪嗰種，大家可以做嘅就係親身去睇吓現場嘅人做緊咩，嘗試去感受吓個氣氛係點樣，因為氣氛唔係可以做出嚟。」
真正的民主精神 在於集思廣益
Greg 形容自己一班「大人」，看著這場「反送中」示威沒有領袖，參與者又那麼年輕，一直擔心不已。惟他認同社會運動需隨時代變而轉變：「當一個機制唔work ，就會有新機制取而代之。無領袖嘅好處，係大家唔需要聽同等，自己討論，比較有領導能力嘅就去分析，然後派差。」
Greg 認為，真正的民主精神，正在於集思廣益：「只係到有重要決策要交涉，會少咗一個比較有牙力嘅代表；好彩仲有議員。」他說，當日大家最關心是哪位議員在場：「呢樣嘢好緊要。」他強調自己到現場，只想給予支持，作恰當的支援，但盡量低調：「唔想過份渲染，只想佢哋知道自己喺佢哋中間，佢哋係會好感動、感激，但唔想有催化劑，我哋淨係想有班大人喺身邊支持佢哋。」
七一後，輿論戰展開，Greg 用手比劃一個小圈：「真正好堅持嘅人可以有這樣多。」然後他再比劃一個大圈：「和應嘅人可以有咁多。」最大的圈是：「相對比較唔係好知發生咩事，佢哋好易游離，好易俾人打散。」
他覺得兩面的資訊都應該要了解：「每個人都有自己preference同政治立場，但可以嘗試跳出comfort zone，睇闊啲，自己都會睇對面嘅嘢，除咗笑之外，有能耐啲去睇，點解有啲睇法可以咁振振有詞嘅？」他說，這場運動或者很漫長，大家除了需要溫暖的擁抱，也可以有點幽默感：「某啲事情，俾自己笑一下囉。」
藝術工作者的社會責任
Greg 並不是突然參與，早在2012年反國教已見他身影。2014年雨傘時，他全副裝備現身龍和道，在藝人中是相對高調。當年，雨傘期間播出的《選戰》，他飾演助選主任張癸龍，後來他參演《導火新聞線》，飾演攝影記者樂嘉輝 (輝爺)。兩齣皆為香港電視的出品。
他說，當年因為參與《選戰》和《導火新聞線》的演出，作為主要演員，自然有做過資料蒐集和準備：「加上港視發唔到牌，又參與『反國教』，加加埋埋變成咁（關心政事）。」他的父親也有身教：「細細個，Daddy 教好多嘢，佢做生意、交朋友，視野好闊，到外國傾生意，會帶埋自己一齊睇，睇到佢點同朋友相處。」後來，他父親讓他入讀自己的母校英華書院：「覺得好多舊生都比較正義。」
藝人舊生除了他，還有導演黃修平、資深音樂人黃志淙，名人還包括退休法官胡國興、南豐集團董事長及行政總裁梁錦松。「記得以前有個溫馨校園計劃，是有中四師兄帶住一位中一師弟，學校鼓勵傳承同溝通，變相令大家好識得照顧後輩，呢樣嘢好難得。」他更惦掛其中一位老師黃太：「佢係個好好嘅老師，教我哋art appreciation 同社會關係，將我哋嘅道德價值觀shape up。」他說，父親曾送他到台灣工作，也讓他明白一個藝術工作者應有的社會責任。
對於藝人的表態不表態，Greg 認為不表態亦無不妥：「而家唔係要分化、批鬥，逼人表態係好無賴。」然而，他覺得藝人需要向粉絲負責：「無謂為咗某啲嘢，破壞喺影迷、歌迷心中經營咁耐嘅形象。」他感慨著那份可惜：「生於斯、長於斯，咁耐都係香港人，唔需要咁急於效忠轉軚，話自己唔係香港人。」
把權力交於適當的賢人
這種敢言，Greg 說不是不擔心工作和前途：「呢幾年開始，淨係想做自己想做嘅嘢，要make the right choice，因為所做嘅每樣嘢都代表咗自己；首先要相信自己相信嘅嘢，然後揀想做，同埋做重量嘅嘢 ，那怕係正面定反面嘅角色，都希望係可以喚醒到一啲嘢嘅作品。」他總把自己形容到很大年紀般：「我哋活到呢一把年紀，不會靠屋企，但屋企人一直好鼓勵我做我想做嘅嘢。」
問他可有想過參政，他強調沒有，而且名字中的「堯」，是父母相信的「堯舜禹時代」，那是個禪讓制時代，是選賢與能的讓賢時代，推崇把權力交於適當的賢人：「我會關心社會，但覺得未係呢個能力，唔會夾硬去做；而且遊行嗰日見到好多獨立團體，有好多好年輕嘅，香港嘅未來係屬於呢班人。」
再問他如果是《導火新聞線》中的輝爺，可以跟林鄭對話，會問甚麼時，他笑著說：「應該都會問佢，係咪仲覺得天堂會留個位俾你。」他還模擬她的答案：「正如今朝我講過，我會用謙卑嘅態度同上帝溝通……」然後跟記者哈哈大笑。那偶然的胡鬧，算是為沉重的6月及未知的7月，作個開心小結吧。
【攝影：Lewis Wong；王宗堯提供資料相片】
觀看原文： 按此連結
