王敏奕唱歌!加盟星夢做歌手:喚醒心中一團火

繼JW喺上月加盟星夢後,再有新成員加入呢個大家庭,佢就係王敏奕(Venus)。喺今日,星夢娛樂為王敏奕舉行加盟記者會,更獲得高層何哲圖(Herman)、杜之克及余詠珊等人支持。

喺記者會中,王敏奕被司儀許文軒問到點解會有做歌手嘅決定時,Venus就話自細已經好受音樂影響,每一首歌都係佢嘅配樂,而佢自己亦有學過彈琴及唱歌,不過入行後喺演員方面機會較多,直至遇到Herman就喚醒佢心中嘅一團火,所以佢好多謝Herman同埋會好努力發展歌唱事業,而現時佢就好俾心機學唱歌及練琴。

現年28歲嘅王敏奕,喺14歲嘅時候已經入行做模特兒。2008年參加電影《烈日當空》試鏡,獲得取錄後開始佢嘅演藝事業,參演多套電影拍攝,例如《親愛的》、《麻雀王》及《超級經理人》等等。直至去到2014年,Venus開始參與電視拍攝,憑無綫劇集《女人俱樂部》中飾演李麗珍嘅年輕版角色而人氣急升,更成為唔少男士心目中嘅女神。另外,佢亦有為邵氏拍攝《飛虎之潛行極戰》及ViuTV《理想國》和《假設性無罪》,Venus近年主力喺電視圈發展,仲有兩套無綫嘅代播劇,分別係《香港愛情故事》及《刑偵日記》。向影視歌三棲發展嘅Venus,今日加盟星夢做歌手,雖然佢之前有三首合唱歌,不過就未試過出單曲,相信唔少網民都會好期待。

王敏奕
王敏奕
王敏奕
王敏奕
王敏奕
王敏奕
王敏奕
王敏奕
王敏奕
王敏奕