現實版《小飛象》受盡折磨 瘦骨嶙峋斷腳慘死

 

由睇預告片已經知道,《小飛象》會係一套入場前要袋定紙巾嘅戲。果然不出我所料。   電影都不及現實殘酷,因為戲放完會散場,但係世情嘅痛苦會延續下去……   泰國就有一隻同Dumbo同名、連命途都相近嘅大象,只不過佢冇Dumbo咁好彩。

布吉一間動物園,就安排Dumbo同佢嘅同伴喺強勁節奏下跳舞,仲要「玩樂器」娛賓。如果唔聽話,工作人員會用尖銳物件篤佢地。由照片所見,年幼大象瘦骨嶙峋,而且仲表現出冇得同媽媽一齊生活嘅不安。事件俾一個保護動物機構揭發,佢地發起聯署,有20萬人簽名支持。

可惜嘅係,Dumbo未有得到自由,就因為傷病而逝世。   保護動物機構發言人指,Dumbo因為營養不良同過度疲勞,身體狀況本來就唔好。有一次Dumbo因為踩入泥沼,脫身嗰陣整斷咗本來已經脆弱嘅腿骨,院方獸醫治療幾日都冇好轉,之後送佢去醫院,當時Dumbo已經好虛弱,留醫幾日後最終都救唔返。   保護動物機構質疑園方冇好好照顧園內動物,但係園方就話對事件表示難過,已經盡力保護大象。   喺泰國,動物園收養大象做表演,係冇法例監管。   下次去旅行,你地仲會唔會騎大象睇表演呀?   原文傳送門

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能