雅虎香港新聞 生下捐精者孩子 12年後相認結局出人意表！
在香港，大約每6對夫婦便有一對要面對不育的煩惱。女性想生仔但無男性伴侶或丈夫，又或男性伴侶或丈夫的精子質素欠佳、精子數量過低，甚至沒有精子，可以點好？香港始終是華人社會，女性若接受捐精，可能會有好多顧忌和考慮。但在外國，接受捐精唔單止可以一圓生育夢，甚至可能組織到一個大家庭。你睇完以下呢個故事，又會否改變對捐精的看法？
美國女子Jessica Share於2005年時想生小孩，無丈夫的她決定在精子銀行挑選一名捐精者。這名捐精者在自我簡介寫上：棕色捲髮，曾修讀文學，喜愛運動；職業是作家、音樂人和的士司機。Jessica心裡覺得好夢幻，對方會否是一個充滿才華但不甘困在office的藝術家呢？
過咗一段時間，Jessica靠呢位捐精者嘅精子，順利誕下大女Alice。Jessica認為大女好完美，於是第二次又選中同一名捐精者，再誕下第二名女兒。
女兒日漸長大 DNA測試包作生日禮物
故事嚟到呢度，大女Alice經已日漸長大，而且好奇自己生父是誰。於是，她在11歲時，膽粗粗向外婆要了DNA測試包作為生日禮物。約八星期後，Jessica就知道Alice生父是一位叫Aaron Long的男子。現今互聯網發達，Jessica當然拿拿聲進行「大起底」，仲好快找到一位擁有文學碩士學位、年齡相近的Aaron Long。
Jessica得閒嘅時候好喜歡研究兩個女兒的特徵，例如薄薄的嘴唇、綠色的眼睛等，有時都會想像一下，唔通捐精者除咗充滿才華，仲有一對綠色嘅憂鬱眼睛？當Jessica喺社交網站見到Aaron學生時期嘅照片，一眼就肯定他是兩個女兒的父親，因為彼此間的一舉一動都很相似，尤其係細女嘅笑容，真係餅印咁。
Jessica隨即向Aaron發訊息，指自己兩個女的基因和他很相似，如對方有興趣可聯繫。事實上，Aaron好耐以前持續捐咗一年精，跟住就停止咗。直至Jessica傳來訊息，先喚起佢記得呢段往事，引起咗佢嘅興趣。
改變戀愛規律 先生兒育女後談戀愛
Jessica同Aaron做咗幾個月筆友，2017年首次見面後，慢慢相愛。Jessica話，情侶拍拖時總會憧憬與對方生兒育女，同Aaron就恰恰相反：先與孩子生活十多年，同Aaron第一次約會時先講返轉頭。兩人宜家已經同居緊，Aaron另一個孩子都搬埋嚟一齊住。雖然未知Aaron捐精實際上有幾多個小朋友，但Jessica就說家中的大門永遠為佢地打開。
原來捐精都可以發展出一段咁特別嘅戀情。大家睇完呢個愛情故事，不妨諗下捐精係咪另一個幫助生育嘅途徑。
捱夜飲膠樽水損害精子健康 仁安精子庫：5年不足30港男成功捐精
相關字：
捐精 精子銀行 生育 不育 愛情 愛情故事 戀愛規律
