生日免費入Lounge!香港航空 全新貴賓室遨堂|同場加映 最新A350飛曼谷
機場貴賓室向來都只有坐商務艙以上才能使用,窮遊旅客想去一嘗貴賓室,難道要日求夜求地勤 upgrade?其實航空公司還有提供不同方法讓乘客進入貴賓室,其中香港航空就有項服務,讓生日乘客可以免費享用 香港航空貴賓室 !編輯部為大家直擊港航新 Lounge,並細數不同入 Lounge 方法。
9月新開!香港航空「遨堂」貴賓室
香港航空原本只有在23號閘口的「紫荊堂」貴賓室,剛剛9月就在中場走廊閘口新開了遨堂貴賓室(Club Autus),比起舊貴賓室足足大幾倍!去到唔怕再同人迫無位坐。
任食雞蛋仔 多款粉麵選擇
香港航空貴賓室最出名就係有雞蛋仔任你食!而今次新 Lounge 更加有近期大熱芫茜雞蛋仔,還有私心推介必食喇沙!香港航空貴賓室有多達 5 款粉麵選擇,唔使再淨係食魚蛋河。
調酒師即席炮製 Cocktail
港航 Lounge 有調酒師駐場,即席為客人炮製 4 款口味 Cocktail,還有為遨堂度身訂造的 Autus 雞尾酒(可選無酒精成份),上機前想歎杯酒舒舒服服係飛機瞓絕對係好選擇!
長途機不能少 支裝水、罐裝飲品
上飛機最想要就係支裝水!飛機乾燥,過境檢查時又不能帶水進去,唔想係禁區捱貴水,Lounge 內提供免費支裝水及各類罐裝飲品,上機前拎定支水就唔使下下問空姐拎水飲。
睇日落、飛機升降
遨堂特別之處就是對正飛機助跑後的升空位置,更可以遠眺機場島日落!留意黃昏時間入 Lounge 西斜情況頗嚴重,怕曬的女士們要坐返入少少位置,但睇日落等上機,非常有氣氛!
私人空間 獨立座位
Lounge 大部份空間都是共用座位,亦有數張 bar 枱供乘客使用;新 Lounge 最特別之處就是有6個獨立睡眠位,可以完全平躺,而且非常寧靜舒服,想眠一眠的旅客要 mark 實!
極秘之頭等專用 Lounge!
港航新 Lounge 還有一個區域專屬頭等艙乘客使用,但香港航空其實暫未提供頭等艙機位,細問下原來只限乘搭伙伴航空公司頭等艙的乘客使用。
中場客運大樓 搭港航超方便
香港航空新 Lounge 位於中場客運大樓,大部份港航客機已經轉到中場客運大樓上落機,要乘搭機場無人駕駛列車去到尾才能到達!由安檢後前往 Lounge,大概要花 10 分鐘時間,想入 Lounge 要預好時間。
【入Lounge 4大方法】
入Lounge的方法,最正常途徑當然是買張商務或頭等機票,但我等星斗市民也不一定望塵莫及嘅,香港航空的貴賓室勝在有以下4大方法,畀Econ小市民都可以一試特殊服務!
01 | 生日待遇 免費入 Lounge
香港航空提供一項貼心服務,只要乘客在生日當天乘搭香港航空,Check-in 櫃台就會給予一張免費 Lounge Pass 以及生日禮物,入到禁區就可以使用港航 Lounge!是香港唯一一間有呢項貼心服務嘅航空公司,抵讚!
02 | 跟壽星同行 親友一齊有得入
壽星仔女唔使怕得自己一個入到而親戚朋友入唔到,港航同時會讓壽星的2位同行親友一同使用 Lounge 服務,絕對唔會留低同行友人一個人喺出面等咁可憐!
03 | 指定信用卡/金鵬會員都入到
除了生日有特別待遇入 Lounge 之外,市面上有2張信用卡都可以入到港航 Lounge,分別是工銀亞洲及建行,最多一年可以入5次貴賓室!雖然有 quota 限制,一年唔會飛太多次的乘客絕對夠用!金鵬白金/金/銀卡會員也可以使用Lounge!
04 | 最後策略:買 Pass
真係好想用呢個 Lounge 又唔想畀多一倍價錢坐商務,可以考慮買港航推出的 Lounge Pass,每張盛惠 HK$350,可以在網上購買再到場使用,抵唔抵用就見人見智。
同場加映:A350新機 9月飛曼谷
香港航空近期最矚目還有引進全新機型 A350 飛 Long-haul!作為港航首批大機,主力會執飛 12月開辦的洛杉磯線,以及明後年開辦的倫敦、三藩市及紐約航線,但少去長途地方也有機會,A350會於9月10日開始試飛曼谷航線,12月前也有機會短途試坐。
3種座位 任君選購
港航的A350客機,經濟艙採3-3-3格局,跟其他航空公司一樣,窗口比一般飛機大,跟港航過往有別的是,機艙分成3部份,最前為商務客位,中間是新增的Economy Comfort,比後排的經濟艙闊多3吋,座位可向後傾斜多15度。但票價上仍未知道是否有別,在即將投入服務的曼谷線上亦未見有Economy comfort的票價,有可能會大量 upgrade 經濟艙乘客到 Economy Comfort!
商務艙可以平瞓
A350商務艙比舊客機的商務艙更闊落,可以平瞓之餘還有 Panasonic 熒幕的娛樂系統,有2個USB充電位,私人空間完全足夠!
相關閱讀:
相關閱讀:
延伸閱讀:
被選中的鞋子adidas Originals Campus! 余文樂又着用!