由反地產霸權到黃色經濟圈 龐一鳴三大貼士：開生產線、擴各行業、滲入藍店

黃色經濟圈討論愈發熾熱，建制陣營以至政府高官相繼追擊：商務及經濟發展局局長邱騰華日前在Facebook直播中潑冷水，說看不到黃色經濟圈可以持續下去；左派在官媒寫文，為黃色經濟圈扣上「港獨」帽子。如按照「敵人反對我擁護」的邏輯，黃色經濟圈可能是個有潛力的武器，但往後如何走下去，仍有很大討論空間。

以消費作為抗爭手段，令人想起早在2010年發起「一年唔幫襯大地產商」的龐一鳴。當年他為對抗地產霸權，拒絕光顧地產商集團屬下的商店，在消費層面杯葛大地產商，行動一度引起迴響。

十年後的今天，大家要「撐黃拒藍」。不少大型連鎖集團都被歸類為藍店，更遑論中資集團旗下企業在各個生活層面的滲透，杯葛起來也非易事。龐一鳴當年的消費抗爭經驗，對今天黃色經濟圈的發展有何啟示？

現年46歲的龐一鳴是自由工作者，主力籌辦社區活動，創立組織如「香港真人圖書館」、推廣本地農業的「港嘢」、籌辦海外藝術交流「一打人去賣藝」等。2010年，曾在大地產集團任職多年的潘慧嫻出版《地產霸權》一書，在貧富懸殊嚴重的社會引起轟動。反地產霸權的議題鬧得熱哄哄，群眾不滿地產商的手伸得太長太廣，生活每個範疇，由電力、交通、超市等，全部都由地產商包攬，旗下商場高昂的租金逼使小店要搬遷或結業。龐一鳴當時發起「一年唔幫襯大地產商」行動，消費上盡量切斷由地產商掌控的商店，不光顧連鎖集團、少用電、不搭巴士地鐵，吸引多間傳媒報道。及後他將經驗寫成《就係唔幫襯地產商》一書，之後連續數年發起「唔幫襯地產商的聖誕」，呼籲大家在買禮物的時候，也要拒絕連鎖集團，轉為光顧小店。

黃色經濟圈如今人人熱捧，龐一鳴說，香港從未試過如此多人參與一個杯葛運動，對此感到開心，但見到目前黃色經濟圈的發展仍有局限。

首先是闊度，他看見目前九成的黃店都是餐廳，鮮見飲食業以外的討論，「我哋要真係建立一個經濟圈，而非單單是飲食圈。」另一局限就是深度，現時只見「消費圈」，而非「經濟圈」，「因為經濟圈第一樣要問嘅係：生產去咗邊？」就如施永青所言，即使光顧黃店，也避免不了供應來源是紅色或藍色資本，「結果，只可以喺最前線嘅銷售層面脫離紅色、藍色資本。」

局限的確存在，但龐一鳴不覺得就要因而被打沉，反而覺得這正是改變的契機。

眼前的杯葛只集中在食肆，龐一鳴認為這與香港人的生活方式有關，「杯葛運動與港人的生活方式掛鉤。今次正正反映香港人生活冇咗好多環節，只係得番出去食飯、去旅行、網購等，好多其他環節都冇。」他說，現在正實踐黃色經濟圈的人，大部分很可能本身也是「無飯夫婦」，或者住劏房，回家也只是睡覺，以至在社區只有吃飯這個消費形式。

沒有餐廳以外的黃色經濟圈發展，龐一鳴認為是因為沒有需求。他舉例：「如果係家庭主婦要實踐黃色經濟圈，因為佢唔會出街食飯，咁佢會去諗嘅就係柴米油鹽、小朋友用品。」但參與經濟圈的家庭主婦似乎較少，故譬如生活用品一類的黃店資料就相對少，也沒有太多這類型的黃店，「當一直冇人要嘅時候，就一直冇人供應，係供求問題。」

龐說，現在就是一個很好的機會，讓我們反思生活方式，能否更多元，「例如會唔會重新煮飯、野餐、或者自己製造娛樂，喺社區有番生活。而家反映我哋冇呢啲生活，所以當去實踐嘅時候，都冇乜範疇可以實踐到。」他的概念是擴闊自己的生活方式，製造需求，藉此將經濟圈擴闊至多個層面。

至於無法「染黃」生產鏈的問題，龐一鳴認為，如果要成為一個經濟圈，就要「自己用品自己生產」，打破只困在銷售層面的局限，往上層生產鏈延伸，「例如餐廳可唔可以用香港生產嘅食材，由本地農場來貨，或者自己生產日用品。如果你唔諗生產，你就會繼續幫襯紅色資本或者財團。」他建議可以集資生產，也可在外地設廠，將成品運返香港，以終極脫離紅藍色資本及大財團。他對於打破局限感到樂觀，「過去唔work，係因為冇足夠消費者支持，個市場承托唔住。而家200萬人出來行過，如果有一半人做，都有100萬人，咁都不得了，係好強勁嘅消費能力，有潛質做到。」

不過，用本地貨源，成本高是一大難題。龐一鳴說，其實現在內地食材價格也有上升，與本地貨源其實沒有想像中那麼大的差距。如果是訂購蔬菜，食店可繞過蔬菜統營處，預先共同向菜農訂購，當數量夠多的時候，價格就可大大降低，不會比內地菜貴太多。至於肉類，龐一鳴建議可以引入外地貨源，「而家內地啲肉都愈來愈貴，近排都見到香港引入美國冰鮮豬，價錢仲平，又例如阿信屋一直都有引入巴西肉。」他甚至認為可以在東南亞開設農場，將養飼的牛、豬運返香港。他覺得，採用本地或非內地貨源成本較貴，是因為以往我們沒有足夠議價能力，「我哋從來冇數量可以抗衡，但如果有100萬人嘅量，你向任何地方訂購各樣嘢，都唔係而家嘅價格。」

這個藍圖如果實踐到的話，的確是可以促進生產自主。不過，現實是目前仍未達到大規模的訂單數量，食店很難有足夠議價能力，以較低價格買入，結果仍是輪迴到「成本高，少人做」的問題。龐一鳴認為，可以參考公平貿易或社企的概念，「例如公平貿易會講明情況，賣貴啲，或者社企請特殊能力嘅人。可以講明話食店係全部支持本地生產食材，希望做到獨立自主，所以價格會貴啲，支持者方面都要付出作為支持。我覺得喺呢種撐黃店排晒長龍嘅情況下，係可以做到。當第一批餐廳都得到支持，就更多餐廳願意做，採購量大咗，就有議價能力將成本降低。」龐說，作為黃店，也非只停留在宣揚政治理念的層面，而是落實到改變社會的實際作用。

如今有人說要杯葛藍店、中資集團，舉例如杯葛美心，一查之下，原來許多食肆都屬於美心集團旗下，龐大的飲食王國原來已悄悄佔去大塊版圖；去到交通層面，長期依賴港鐵久了，加上線路規劃覆蓋面廣，要罷搭「黨鐵」也不是人人能做到。大集團掌控之廣，要杯葛不是易事。

杯葛之難，在於其無孔不入。香港過去的發展模式，一直助長大財團滲透我們的生活。龐一鳴說：「過去政策上幫緊大財團，或者冇阻止佢哋壟斷，以至發展模式，例如所有佢哋嘅購買點喺晒交通同住屋中間嘅通道，都助長咗大牌子、連鎖店嘅擴張。」於是最方便購物的地方，往往都是大財團的產品及服務。再舉例，如大學校園餐廳由連鎖集團營運，學生就要被迫幫襯；又例如刪減渡輪航線，或是拒絕在海濱規劃單車徑，變相要焗住搭「黨鐵」。問題源頭在於制度，「Day1就要喺制度爭取。例如大學生應該爭取校園內最少一間餐廳唔係財團、例如恢復渡輪航線，以至於唔使一定要搭地鐵。我哋應該善用百萬人嘅力量，實現各種自主。」

為了抗衡，龐一鳴建議應該鼓勵黃店合力結集在每區的某些範圍，以達至集群效應，「點解財團會成功，就係因為方便。過去非主流經濟最大問題，就係好唔方便。我哋要諗下可唔可聚埋一齊，例如旺角區聚埋某一兩條街，大家就咁行呢幾條街就可以買到好多嘢。各區都係咁嘅時候，你就抗衡到主流經濟。」

當年反地產霸權運動與今天相比，其實有點不同，例如「誠哥」李嘉誠，當年是地產霸權的象徵，但到了今天，李卻搖身一變成了「最強和理非」，獲網民擁戴。龐一鳴說，表面看來似乎有分別，但其實本質上沒有，「誠哥都係幫緊短期嘅紓困措施，但佢都係喺壟斷制度中嘅持分者，佢嘅角色冇變。」

透過這次消費運動，壟斷的經濟結構更現形。龐一鳴分析：「你會發現好多黃店都係cafe，好少茶餐廳，原來嗰種壟斷嘅經濟結構好明確，最貼近市民生活嘅嘢，全部都係財團資本，或保守資本營運。於是某程度上可有可無、唔係普通街坊消費嘅，例如cafe，就多黃色。」所以就算眼見有許多黃店冒起，其實經濟結構也沒有改變，「最核心嗰啲都係財團，或者紅色、保守資本，好似電力、交通、藥房。而家都係繼續畀保守資本控制緊我哋核心生活，郁唔到成個制度。」

那怎麼辦？「咁大家唔好淨係做cafe，可唔可以做吓藥房、粥舖、茶餐廳之類？」他建議大家去做「臥底」，滲透一些被藍色資本佔據的行業。但進入一個充斥藍色資本的行業，分分鐘被同行、供應商杯葛，如何做生意？龐一鳴以阿信屋作為例子。阿信屋曾被視為對抗超市壟斷的小店，開業初期疑因貨品售價太低，被供應商施壓，停止供貨，「咁佢就去搵其他國家嘅貨，迴避固有供應商壟斷嘅問題，結果佢都搵到一啲其他地方供應嘅平價來源。」

他甚至建議，可以開間麥當勞或者7-11，「而家係戰爭狀態，希望大家有作戰意識，你要唔介意開間M記、7仔，入去佢制度搞吓事，做啲唔同嘅嘢。如果唔係就係而家咁，文青地方先係黃店。」但問題是加盟連鎖品牌，總要面對母公司的規範，如何可以有所作為？「當然賣嘅嘢、裝修都係一致，好多嘢要跟番，但操作上好多細節可以自己選擇，例如揀請咩人、或者你去run間M記，至少警察嚟你唔會落閘，就算係搵錢支持運動都好呀。如果你開cafe，咪得文青會嚟，冇可能serve到師奶、小朋友，咁你做嚟做去都只係serve緊同溫層嘅人。」不過，外人未必知你是「臥底」，分分鐘被認為是助紂為虐的一份子，豈不是兩面不是人？「你而家要以作戰心態去做，做臥底係會畀人鬧，但為咗目標你就要去做，暗渡陳倉。」

龐一鳴又建議，另一條戰線是直接與既有藍店品牌抗衡。例如日前日本牛肉飯專門店「食其家SUKIYA」登陸香港，正好衝擊吉野家，「不同品牌，都會有類似嘅替代品，試下將佢引入來港，都係可行出路，令黃店服務更闊，以至照顧消費者需要的同時，建立自己網絡。」

總之，寸土必爭。

龐一鳴2010年發起對抗地產霸權運動，一度引起迴響，不過參與人數不及是次黃色經濟圈行動龐大。龐說，當年他與其他人所做的，是前期意識推廣，以至大家這次也很快選擇了以杯葛作為抗爭工具。十年間，也是一個進程，期間多區經歷重建，很多小店消失了，也一直有人提及要支持小店。2014年傘運的時候，也有提及過與今天類似概念，不過力量尚未形成。到這次運動中，某些企業的言論及行為添加了燃料，於是再有人提出杯葛運動時，很快就一呼百應。

藉著百萬人的力量，能否打破局限，反過來向當年抗衡地產霸權的目標邁進一步？龐一鳴覺得，只要有上述打破局限的思維，一定可以有影響，現在正是好機會，「唔好只係覺得，你上唔到前線，做和理非就做呢啲，唔係咁。黃色經濟圈係可以衝擊到制度，幫手從根本改變制度。」

觀看原文： 按此連結