雅虎香港新聞 男友贈勞力士給媽媽惹女友呷醋 王貽興專欄：這種女友要不得！
討論區有男生訴苦，說自己辛辛苦苦儲錢買隻勞力士送給母親，只因不小心跟女友提起，女友就立即問自己有冇份，男友坦言自己才剛畢業不久，積蓄不多，買了勞力士給母親已所餘無幾，沒想到就被女友懷恨在心，從此每天都被擠兌諷刺，不管什麼事情，女友都要問自己有冇份……
老實講，廿幾歲仔，又唔係老豆老母大把錢，正常畢業後還完關窿，都仲肯儲錢買嘢畀阿媽，點都叫做上進同孝順吖，咁都要嬲豬？講真，佢月入十萬九千七？平時同你拍拖唔洗畀唔洗用錢？咁你有錢又唔見有條仔份？如果條仔破咗產，你係咪又會咁好死照衝出嚟問有冇份一齊幫手孭債？
有種女友就是這副德性，咩都要有佢份，否則你就係唔夠愛佢，你買咗件衫畀自己，啊你買咗件衫畀自己，咁我呢？我有冇份？啊你同朋友去旅行，咁我呢？我有冇份？你出咗雙糧買嘢送畀自己？咁我呢？點解冇我份？
點解啲男人永遠要偷偷瞞住另一半買玩具買相機買衫買袋買鞋，就係因為佢地不幸同咗個咩都要關佢事嘅女人一齊。呢亭女仔講到尾四個字：「心胸狹窄」，再講白啲，就係兩個字：「貪X心」。完。
一個真正獨立上進自愛既人，就算自己屋企有錢我都唔會洗佢地一分一毫，正如有啲女仔，就算男友幾有錢都好，都唔關佢地事，堅持自己搵錢自己洗，我賺到我買衫買袋做Spa去旅行，天經地義，唔洗睇人面色，洗亦洗得開心痛快，你嘅錢係你嘅錢，關我咩事，呢啲女仔，就算外表夠唔夠靚都好，都總有份莊敬自強嘅自信同氣度，企出嚟昂首闊步，靚到發晒光，同果啲小家子氣，四圍昅住有冇著數有冇自己份嘅女仔，生得幾靚都大打折扣，一望已經係天同地嘅分別。
果啲好高騖遠又成日妄想不勞而獲嘅情人，永遠期望四圍痴人著數，我嘅錢梗係我嘅錢，但你嘅錢都係我嘅錢，呢啲屈原的後裔，拍多幾次拖，離多一兩次婚，分分鐘就成為富婆，幾層樓響手，點解咁多女冇見幾年靜雞雞食雞批，冇嘢做但又唔洗做，咪就係咁解囉。
前往瀏覽完整內容:
更多相關報導:
