男神人氣沉降史 周柏豪7大奇聞

拎過叱咤男歌手金獎，開過2次紅館個唱，周柏豪曾經係90後00後嘅男神，全盛時期一街後生仔都係柏豪「比比鳥」頭加全黑造型。不過近年人氣下滑，最近甚至宣傳商場活動都被網友洗版負評。唱《一事無成》為失業人士「打氣」以外，柏豪多年來都有唔少神奇事發生，唔多唔少有7樣。

一爆成名玻璃杯

發生咩事呢張圖有齊，唔駛多講啦啩。奠定「大文豪」名譽嘅神作，甚至可能係身為唱作人嘅柏豪，最廣為傳頌嘅作品之一，當年有傳媒甚至搵才子陶傑同補習名師評價柏豪文筆，陶傑直言「題材無聊」。

家駒死忌當生日

2013年，柏豪喺Beyond已故主音黃家駒逝世20年當日，晌IG出post紀念，但竟然寫「祝你生辰快樂」。後來網友留言以及電台DJ雲妮提醒先知搞錯咗。

狂迷岑晉晴

有偶像就有瘋狂fans，2016年就有網友發現，經常有位叫「岑晉晴」嘅女fans喺柏豪fanpage留言表現愛慕，甚至當自己係柏豪女友，原因係有次活動之上掂到柏豪手指，有咗……身體接觸之後，就升呢了。後來柏豪同圈外女友結婚，岑晉晴就表示「他結婚新娘不是我，祝褔他吧。愛情只不過是過眼雲煙。」，仲將愛意改為投射到林俊傑。

櫻花樹下的free rider

周柏豪2013年的演唱會請到張敬軒做嘉賓合唱《櫻花樹下》，但係唔少高音位都由軒仔唱，俾網民質疑柏豪唱功，仲話佢好似返學做group project嘅free rider咁冇貢獻。早排柏豪做TVB《聲夢傳奇》導師嘅時候就重提舊事，話《櫻花樹下》曾經難倒過佢，因為軒仔話首歌係屬於佢，建議將難唱嘅畀晒佢唱，本來軒仔做嘉賓係減輕柏豪壓力，但係結果反而增加咗唔少壓力。

參加「10K馬拉松」 即係10K定馬拉松？

有做開運動嘅柏豪2016年底為代言的金融集團到柬埔寨參加10公里賽事，但係出post就寫「10km馬拉松，我們完成了。」。由於馬拉松代表全程42.195公里賽事，所以係冇「10km馬拉松」呢樣嘢。同時，又有網友發現柏豪嘅參加者號碼屬於另一位跑手，而用柏豪個名搵到嘅資料，就標示性別係女性，引起質疑。柏豪就解釋號碼布係大會安排，又承認未有完成賽事，原因係中途要去拍攝。

放榜打氣唱《一事無成》

上星期喺慈善show上同鄭融唱《一事無成》為失業人士「打氣」成為笑柄，有網友發現原來同類事件唔係第一次！原來喺2008年中學會考放榜前夕，鄭融同周柏豪出席《放榜前的一個晚上》活動為學生打氣，當時佢地都係合唱《一事無成》……咦，又係TVB節目，乜咁巧合呀？

簽星夢計錯數

拎完叱咤男歌手金獎之後，柏豪2017年出人意表地簽約TVB旗下嘅星夢娛樂，擺明想「入屋」兼北上發展。但係如意算盤打唔響，叫人登記做選民就被內地粉絲鬧，接受阿叻訪問就被香港fans割席，兩邊不討好。而星夢喺何哲圖(Herman)掌政時期，歌手成為勁歌頒獎禮常客，但亦為人詬病，即使柏豪拎過最受歡迎男歌星都被批評無代表性。後來曾志偉入TVB做高層，搵何麗全取代Herman做星夢CEO，個個都人心惶惶，何麗全之後先派定心丸話第一個見嘅歌手係柏豪，暗示一哥地位不變。不過TVB同三大破冰後，星夢唔再係「獨家村」，而TVB風頭又俾Viu搶去唔少，柏豪真係要諗下點打救人氣，免得「幾年來毫無成績」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！