男神對決! 張敬軒惡補廚藝 陳家樂最叻煮白飯

軒仔透露會煮西班牙紅蝦。
軒仔透露會煮西班牙紅蝦。

兩大男神張敬軒與陳家樂比併廚藝,軒仔事前跟名廚惡補,家樂則自誇有30多年煮白飯經驗,質素媲美日本壽司飯,但卻叫湯怡食定止屙丸,非常搞笑。

鄭裕玲(嘟嘟)、張敬軒、陳家樂、胡定欣與湯怡等,昨日出席無綫節目《男神廚房》拜神儀式,擔任總評判的嘟嘟表示要求食物色香味俱全,即使面對男神,味道不好一樣扣分!以西班牙紅蝦出戰的軒仔透露事前惡補廚藝,面對另一男神陳家樂,他大讚對方廚藝了得,自誇煮中西餐均不俗,但未敢輕言取勝。問到平日可有指導女傭「遮遮」下廚?他笑言:「畀佢自由發揮,我人好,佢執嘢企理就OK,同埋佢有上家政班,不過我出街食多。」

湯怡食定止屙丸

對於被軒仔讚廚藝出色,家樂笑言:「佢講笑啫!不過我煮白飯有30幾年經驗,煮到好似壽司飯咁。(緋聞女友連詩雅食過?)個個朋友都食過,不過呢排少煮,依家自己住。(係咪同居?)唔係。(除咗白飯,最叻煮乜?)煮雞蛋,童軍時拎過章,疫情期間煮嘢食都叻咗,煎牛扒OK。」而負責試食的湯怡質疑家樂廚藝,她說:「我仲有幾磅就去番未懷孕嘅磅數,今日佢會助我一把,因為佢負責煮,我負責食同評分,所以佢叫我食定止屙丸。」

至於曾在《美女廚房》獲劣評的胡定欣,笑言今次反過來為男藝人評分感覺特別:「喺咁Grand嘅場,就算唔好食,吐出嚟都要有儀態。(靚仔會加分?)呢個係視覺享受,我都希望搵到咁嘅人,實在太耐冇食過男仔煮嘅嘢食。(搵男友都要煮嘢叻?)我會努力。」

湯怡唔信陳家樂廚藝出色。
湯怡唔信陳家樂廚藝出色。
胡定欣笑言很久沒吃男士煮的食物。
胡定欣笑言很久沒吃男士煮的食物。
鄭裕玲期待品嘗軒仔炮製的美食。
鄭裕玲期待品嘗軒仔炮製的美食。