異搜店｜雙冠軍陳曉華暫未再有機會擔大旗？閒置期間考獲跆拳道黑帶望演打戲

TVB劇集《異搜店》將於今晚（14日）播映大結局揭開韋德信（何廣沛飾）父親之死亡真相，及韋德信與馮祖儀（陳曉華飾）嘅感情發展；而劇集中，首擔第一女主角嘅陳曉華更加被觀眾大讚有進步。

27歲陳曉華為2018年香港小姐冠軍，翌年參選《國際中華小姐》再次贏得冠軍，係繼李嘉欣、郭羨妮、陳凱琳之後第四位奪雙冠軍嘅香港小姐。陳曉華卸任後機會不斷，出道兩年已被安排出演《迷網》第二女主角「蕭美婷」，不過就被網民狠批其演技生硬，講嘢又黐脷筋，令陳曉華受到好大打撃；不過由於當時正開拍《異搜店》，陳曉華分享同劇拍檔及前輩都會糾正佢嘅問題，汲取別人意見改善之外，陳曉華都有試過咬木塞、搵言語治療師改善發音、又參加電影導演彭秀慧嘅演戲班等等，喺《異搜店》演出令網民覺得比起之前《迷網》處女作有驚喜。

未知係咪觀眾對陳曉華評價參差，令佢上位之路有啲阻滯咁。自從拍完《異搜店》就未再有擔正女一嘅演出機會，呢年幾以嚟只有參與短劇《廉政行動2022》及啱啱開拍嘅《法證先鋒V》；期間，陳曉華就利用空閒時間學習唔同事物，例如佢對打戲有興趣，所以走咗去學跆拳道並考獲跆拳道黑帶，又開設YouTube個人頻道，希望記錄生活之餘，同時鍛鍊剪片技巧與口才。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！