「當值時我會想著你」 二手店發現 65年前士兵的道歉情書

幾個月前，我地報導過一位居英華僑，透過社交媒體，幫媽咪搵得返當年青梅竹馬嘅小情人。呢位媽媽年青時要離開香港，佢嘅意中人寫咗一段短而深情嘅情信，話會「永遠愛你」。   呢啲失落的情信故事，零舍動人，因為我地都想知下文。   英國一間慈善二手店，店員喺一個購物袋入面搵到一封舊情信。呢封信，寫於1953年。

寫信嘅相信係一位叫Jack嘅士兵，內文係想向Jacqueline表示歉意。Jack本來當晚約咗Jacqueline，但因為要當值而要爽約。佢仲向Jacqueline保證，之後一星期會抽幾日，甚至每個週末都會見面。補償完梗係要氹，Jack就同Jacqueline話「當值時我會掛住你」，又約定第二晚會揸電單車去搵佢。   而家好多人根據信上資料人肉搜尋，想睇吓到底Jack同Jacqueline之後嘅故事發展成點。我都好想知，究竟封信有冇及時收到？有的話，佢地有冇繼續發展？點解封信會流落街頭？冇嘅話，有冇因此產生誤會？大家有冇分開？

發現呢封信嘅二手店，負責人就話好少可會喺收回嘅衣物搵到咁感性嘅「失物」，佢地都好想盡快搵到Jack或者Jacqueline，希望可以物歸原主。原文傳送門