【疑新冠奪命】李偲嫣做過鄺美雲經理人反面收場 搞音樂雜誌拖糧欠稿費

親建制團體「正義聯盟」發起人李偲嫣尋日喺屋企暈倒，送院後不治，終年56歲。有報導話李偲嫣嘅新冠病毒檢測呈陽性，但仍未知真正死因。近年經常出現喺新聞版嘅李偲嫣，搞政治活動之前原來曾經涉足娛樂圈，幕前幕後都做過。

原名李艷青嘅李偲嫣，入行前係張國榮超級粉絲，更加做過歌迷會會長；佢又做過TVB臨時演員，似乎對娛圈工作甚有興趣。後來李偲嫣因為朋友介紹而認識當年聲勢唔錯嘅鄺美雲，仲做埋對方經理人，另外又簽咗歌手莫鎮賢、前TVB藝員張沅薇。

不過鄺美雲同莫鎮賢喺同李偲嫣合作一年幾之後就開記者會宣布解約，李偲嫣喺記者會外派傳單聲稱自己冇財政問題，記者再向鄺美雲了解先知有人唔夠老實。多年後莫鎮賢話因為同公司嘅藝人都發現部份演出嘅合約有問題，於是提出終止合作。

除咗鄺美雲同莫鎮賢，林志美亦都同過李偲嫣合作，不過喺訪問時林志美話信錯某啲經理人，影響歌唱事業。

樂評人翻舊帳 拖欠稿費廿幾年

樂評人袁智聰喺李偲嫣逝世後出post，憶述90年代李偲嫣搞過一本叫Music and Entertainment嘅音樂雜誌。袁智聰因為該刊編輯介紹而供稿，後來認識埋當年叫Lettie嘅出版人李偲嫣。不過雜誌出咗唔夠一年就清盤收場，有職員被拖欠幾個月薪金，袁智聰都被拖欠幾期稿費，搞得並不愉快。

【相關搜尋】李偲嫣停車場重演求婚情節